Semaine 4  2007 par Catoupi

Quisque ch'est qui n'a jamais fait d' boulettes ?  Je n' parle pos ichi des ceusses à l' sauce tomate, pasqu'alors j'areos puteôt dit "des bourlettes"... Neon, ch'est des boulettes dins l' sens de "bêtisses" que j' vas ichi parler.

A chaque feos, à l' fin d' l'ainnée, les télévisieons et les gazettes i nous abreuftent d' bêtisiers.  Mi, j'aime acor bin cha quand ch'est eine feos d' timps in temps.  Malhureus'mint, i feaut croire qu'i n'eont pos bramint l' temps d' cacher après des nouvelles, adeon i z'orserftent souvint les mêmes boulettes.

Pourtant, i n' feaut alfeos pos cacher bin leon... Au début d' janvier, j'ai li dins eine gazette que l' prumier bébé de l'ainnée dins l' régieon i mesureot ... quater-vingt-treos chintimètes !  Bé avec eul poids qui-aveot, qu' ch'éteot tout à fait normal, ç'l'infant-là i d'veot ête fameus'mint allongé !

In France, Sarkozy i vient d'in faire eine belle ed' boulette : i-a orpris tout sérieus'mint eine citatieon d' Mitterrand.  Et in réalité, ch'éteot eine citatieon d' Giscard !  Bé, m'n'heomme, i conneot bin l' politique de s' pays !

Acor eine féaute de frappe dins l' gazette : Mossieu Di Rupo i-areot proposé d' canger l' frontière linguistique in r'mettant Rohde in Wallonie.  N' cachez pos su l' carte, savez !  L' journaleu i parleot d' Rhodes-Saint-Genèse...

A l' télé française, i-a eine espikrine du journal qui-a anneonché l' titre du film qui-alleot avoir après.  Elle s'a abusé et elle a deonné l' titre du film de l' chaîne "ennemie".  Seûr'mint qu'elle aveot prévu d'orwettier l' chaîne concurrente !

A l' piscine de l'Orient, i-a eine affiche qui dit : "à partir de ce dimanche à 16h, la piscine sera fermée " ... prumière queosse : i n'est pos marqué d' queu diminche qu'i s'agit... "réouverture le 12 février 20007 à 7h"...  Z'avez bin li ?  ch'est précis, cha va rouvère à sièt heures du matin l' dousse févérier, mais in... vingt mille sièt !  On saveot bin qu'i-aveot bramint d' défeauts à ç' bassin d' natatieon, et bramint d' travéaux à faire, mais tout l' même, cha va faire leon !  Vaudreot mieux in r'construire eine nouvelle, cha l'ireot pétête pus vite !  Acor hureux que l' Bourguémette i n'a pos laiché fermer l' piscine de Kain !

Trèfes ed' plaisant'ries, là-d'ssus, j' vous souhaite acor eine beonne ainnée... 7002 !

Catoupi