Semaine 20  2007 par Arnitoile

J’sus tout in foufiète pasque ç’verdi, ch’est l’fiête de l’accordéïeon ! Ah, ch’est devenu eine des pus belles fiêtes de l’ville ! Tout ein quarthier invahi par des cordéoneux d’tous les ginres : tout seus ou in groupe, jeuant uniquemint des airs ou avé des canteux, ou acor avé l’accordéïeon comme unique instrumint ou avé d’z’éautes musiciens. Et d’toutes sortes d’musique : de l’cancheon françaisse, de l’musique tzigane ou d’l’Europe d’l’Est, du folk bin d’chez nous, de l’musique style bal populaire, comme in France, que te t’croreos à l’fiête du quatorse juillet,… Et des cordéoneux qui viennent’tent de l’régieon, ou des visins du Nord, ou même des Flaminds qu’on est contint d’vir qu’i d’a cor que ch’est pos des estrémisses anti-walleons. Tins, l’ovlà pou l’guife de Mossieu Leterme !

Bref, i d’a pou tous les goûts. A réconcilier les ceusses qui dis’tent que l’accordéïeon, ch’est pos de l’musique. Pasque mi j’dis : pou de l’musique, ch’est de l’musique, vu qu’on peut in trouver toudis à s’goût. Pasque l’formule, elle avec, elle est originale. Nos cordéoneux, i jeutent dins les bistreots et les restaurants, et si on de l’sanche avé l’temps, i jeutent neon pos dins les cafés, mais pa d’vant, su l’rue, ç’qu’i fait qu’si i-a ein groupe qui vous plaît mouins, vous avez toudis l’occasieon d’aller in acouter eine éaute ein peo pus leon.

Et ç’qu’i-a acore d’pus original, ch’est qu’tout cha, ch’est gratuit : i n’feaut pos dépinser d’liards pour rintrer dins l’quarthier (ch’est pétête pour cha qu’i-a autant d’Tournaisiens qui vienn’tent, éné). N’impêche, mi, je m’deminde commint qu’Anne Bierna et s’n’équipe, elle fait avé aussi peo d’moyens. Pétête que mes gins de l’régie communale du state de fotbal, i pourreotent li d’minder consèl ; cha évit’reot d’devoir rinflouer leu caisse avé les subsides de l’CET qui pourreot’tent profiter à d’z’éautes, comme l’carnaval ou l’Piste aux espoirs.

Einfin pour orvénir à l’accordéïeon, ch’t’eine soirée qu’elle est vraimint conviviale, dùsqu’i feaut v’nir avé vo famille, vos amisses, et cha d’siept à septante-siept ans, et même au-d’là. Vous voirez que ç’qu’on déleomme l’piano du paufe, i-a acore bramint d’avenir pa d’vant li.

Tins, mi j’conneos l’tout grand patreon d’eine grante organisatieon sociale qui-est pus habitué à fréquinter les cabinets ministériels et qui pourreot li-même dév’nir ein jour minisse, qui-a comme passieon l’accordéïeon. I-a v’nu vir i-a d’jà eine paire d’ainnées ce qu’ch’éteot – ichi à Tournai, i peut v’nir inconito pasqu’i-a perseonne qui l’conneot et qu’i-a perseonne adeon qui l’orconneot - I trouèfe que ch’est l’pus belle fiête de tout ç’qu’i-a déjà vu dins différints coins du pays et même chez nos visins du Nord ! Et i-orvient chaque ainnée ; pour rien au meonte, i voudreot manquer cha ! Et i-a bin raiséon !

Ahais, i-a eine cosse d’important qu’j’ai oblié d’vous dire : comme ch’est gratuit, n’obliez pos vos pièches de monnaie pou mette dins l’casquette de nos amisses cordéoneux, ein p’tit geste qui moutrera qu’vous êtes fin bénaisse d’les acouter jeuer et d’passer eine soirée aussi exceptionnelle ! Allez, à verdi !

Arnitoile