Semaine 01 2010 par Du beos d’chuque 
Et bé queulle affaire, on attindeot cha d’puis eine paire de s’maines: el’ voyache à Paris avé l’z amisses du Cabaret Walleon.
Cha va core pasqu’on a pos du s’ lever treop timpe et i n’aveot pos treop d’ gins d’sus l’ route. Ah cha, i n’a pos d’ doute, Paris ch’est eine belle ville; quand ç’ que t’arrifes là au mitan d’ tous ces molumints et ces bieaux gardins te n’sais pu dù mette tes is de l’ rache qu’ia des affaires à vir.
Et comme ch’t’eot l’périote de Noë et bin on a pouvu vir el’ville leumière sous ses pus bieaux atours.
Tout partout dusque te raviseos ch’éteot estraordinaire. Des vitrines avé des p’tits bonsheommes qui bougeot’tent dins tous les sens et dins les boutiques des loques pou les feimmes s’mette sous leus pus bieaux atours.
Ah pour in vir on d’a vu des affaires pus luisantes les eines que les eautes. Et des gins cha te peux dire qu’i d’aveot et tout cha pou préparer les fiêtes de Noë et du Nouvel an.
Ouais mais à côté d’ tous ces gins qui seûr’mint deveotent avoir des liards dins leu poche, i-aveot d’sus les trotteoirs des heommes pos treop propes et même qu’i-éteotent imballés dins des couvertes ou des beoites in carton; asseurés qu’i n’aveotent pos touché leu quinzaine pasqu’i d’mindeotent eine pétite écapure à tous ces gins d’ passache qui n’in aveotent rien à cirer.
Infin on n’est pos là pou orfaire l’meonte pasqu’ia des gins qui seont payés pour cha (infin pou ç’qu’i croiftent qu’i feont)!
Orveneons à no n’émervell’mint pasque du seoir cha ch’éteot acore pus pire, des leumières tout partout, eine grante roue tout plein d’pétites loupiotes et les Champs Elysées avé des arpes rimplis d’feulles bleusses tertoutes plus lumineusses.
In fait ch’n’est pos vraimint pou tous ces leumières qu’on éteot v’nus mais surtout pou d’aller acouter des canchonniers Parisiens. Et bin là on n’a pos été déçus pasque mes gins i seont acore pus fouteus d’gins qu’ les canchonniers du Cabaret Walleon... infin, ein p’tit queop!
Beonne ainnée 2010!
Du beos d’chuque