Semaine 02 2010 par  Catoire  

Mes gins, j' vous souhaite eine beonne et hureusse ainnée 2010.

J'espère qu' vous avez pris des beonnes résolutieons pou les dousse meos qui vienn'tent. Sineon, i-est acor temps d'queusir dins l' tas.

Si vous feumez acor, vous pouvez promette de n' pus d'aller qu' dins les bistreots dusqu'on sert de l' pétite restauratieon, ainsin cha s'ra d'jà pus facile.  Si vous mingez d' treop, vous pouvez décider d'aller dins des restaurants dusqu'on fait régime mais adeon, cha ch'est d'jà pus rare! Vous pouvez alfeos queusir d'aller faire vos commissieons à pied ou in véleo. Ch'est fort écologique mais à l'allure que tout roule à Tournai, ch't' eine «optieon» qui-orsanne eine milette à l' roulette russe.

Mi, j'ai trouvé ein choix original et sans danger. J'ai promis de n' pus m'plainte pindant tout l'ainnée. Ah! l'mode d'imploi i s'ra facile à trouver, j' n'arai foque à raviser et acouter tous les grincheux et faire à r'bours d'eusses.

Eximpe, l' sémaine passée j'attindeos m' tour à la poste et à côté d' mi, assisse sur eine cayère, eine pinsieonnée attindeot l'sien, s'n' assignatieon à s'main in mourmonnant dins ses fausses dints. J' li dis «Madame vous n' connissez pos vo bonheur, vous êtes là bin installée, dins l' caleur et in puque on vous paie pour cha»! Elle me répeond «Je l'sais bin Mossieu, mais dusqu'on va si on n' peut même pus rouspéter».

Quoi ç' que t' veux répeonte à cha! Et j' pourreos continuer pindant treos paches intières.

L' cinsier i s'plaint du temps qui fait: treop freod, treop cru, treop sec. L'commerçant i n'est jamais contint neon pus. I n'a pos vindu assez, l' brad'rie n'a rien rapporté, on n' peut pos garer dix carrettes, pour rien, d'vant s' boutique. Les clients ch't' eaute cosse: on attind treop lommint au docteur, au pharmacien, au boucher sans jamais busier qu'i-a bramint des gins su tierre qui n'eont pos à attinte comme cha pasqu'eusses i n'eont rien pou s' soigner ni pour minger.

Les riches dis'tent qu' les liards i n' rapportent pus rien, les moins riches dis'tent qu'i n' gagn'tent jamais au Lotto, mais souvint i n' jeut'tent même pos. I-a foque eine sorte de gins qui n' rouspètent jamais ch'est les peaufes, les SDF, les gins qui-eont tout pierdu ou presque. Eusses on n' les intind jamais et pourtant i d'arreotent d'z' affaires à dire.

Mais l'ov'là, comme diseot m' professeur de français à l'athénée «Les grandes douleurs sont muettes». J' pinse à ceulle phrase à chaque queop qu' j'intinds quéqu'ein qui s' plaint d'aisse.

Catoire