18 avril 2018 par Tignasse

Bonjour mes gins, j'in r'viens toudis pos de m'n avinture que j' me d'minte dùsqu'on va et d' quoisque d'main i s'ra fait. Du temps de m' jeonesse, m' mopère m'appreneot à réparer ou bin à récupérer d'z'affaires avant d' tout foute à l'ordure. Tout ç' qui pouveot ête réparé l'éteot, proleongeant ainsin s' durée d' vie et ch'teot ein bonheur du style d' dire qu'on aveot eine télé d' p' puque d' douze ans. Z'avez cor eine télé d'au moinse douze ans, vous-z'éautes ?

J' vous apprinds pos qu'asteur tout i-est carculé pou caire in raque après l' périote d' garantie. Mais dùsque j'ai été estomaqué, ch'est chez « Mister Minute ». Fini l' temps du p'tit cordonnier d' quartier qui saveot faire s' métier. J' m'ai présinté in d'mindant si cha s'reot possipe d'orfaire l' pétite couture à m' savate qui-éteot partie au niveau des deogts d' pieds, pou mi ainsin ortrouver tout l' confort que j'aveos d'dins ! (paire acatée vingt eureos i-a six meos)

El' bonheomme i m' dit qu' ch'est possipe mais qu' cha deot être inveyé à l'usine principale pasqu'i n'a pos l' machine qu'i feaut su plache. « Ah beon ! » que j' li fais, « Et combin d' temps qu'i faudra ? » I d'aveot pour au moins dix jours et pou l' prix : quatorsse eureos ! « Ed' quoi ? quatorsse eureos pour eine couture ? Et vous vous éteonnez qu'i-a pus foule ? Pou vingt eureos , j' d'ai eine nouvelle paire et dins eine paire, i d'a deux des savates ! » J' li ai dit à r'voir et merci, orprenant m' savate avec mi. Attindez, ch'est pos tout...

J' sus passé au « Brico » qu'i-aveot jusse à côté, pour aller, pindant que m' Gertrute f'seot les commissieons, acater ein p'tit tupe ed' colle espéciale pour approuver d'orcoller l' semelle mi-même. Après dix minutes d'avoir tourné dins l' boutique, à l' caisse j' d'ai eu pou 8 eureos. Ch'est pos donné, l' colle à sorlets ...

Mais m' surprisse, cha a été à l' sortie : m' Gertrute éteot toute hureusse d' m'anneoncher qu'elle m'aveot trouvé eine nouvielle paire d' savates in promotieon à dousse eureos ! D'ortour à l' maseon, l' colle n'a jamais t'nu... Du queop, l' vielle paire et l' colle i-eont volé au bac et mi j' sus resté su m' questieon ... Commint ç' que ch'est possipe qu'asteur réparer orvient pus tchier que fabriquer ? J' pinse que j' n'areos jamais su espliquer ceulle affaire à m' mopère.

Tignasse