2 mai 2018 par L' Grante vadroule

Ch'est organisé pau l' Royale Compagnie du Cabaret Wallon Tournaisien.

L' diminche 6 du meos d' mai, après-deîner, i-ara tout plein d'infants d' Tournai et d's alintours qui veont moutrer qu'i seont bin « des gosses, eine binde de p'tites rosses », comme tertous i l'a été dins l' temps. Cha va s' passer à Tournai dins le Hall des Sports pa d'rière l' Maseon de l' Culture. Cha va c'mincher à 13h30 et ch'est intrée libre, l' sortie avec. Av'nez adeon.

Là, te vas d'intinte. Des chintaines de p'tits rambiles d' 26 écoles i veont canter, jeuer du théâte, orprinte des provierpes et faire tout plein d's eautes affaires que te n' pins'reos même pos. Tout cha in picard d' Tournai obin du villache d' dusqu'i vienn'tent.

Dins l' temps, on n' laicheot pos l's infants parler in patois. Les maîtes d'école i pinseottent qu' cha les impêcheot d' bin causer in français. Asteur on veot l' résultat. Acoute leu parlache, orwette leu n'orthographe. T'as compris qu' ch'est eine « réussite » !

Hureus'mint tout i-est pos perdu. I-a des meots qui d'meur'tent dins l'usache. L' soyeu, ch' n'est toudis pos l' fils du soyeu, mais l' soyeu li-même. S' manman i prind toudis s' pétit bradé su s'n écour. On minche acore des coucoubaques et on les fait saut'ler dins l' payelle l' deusse d' féverrier à l' Cand'leur. Asteur qu'i fait bieau, te deos cruauder dins t' gardin. Et quand ch'est fiête, l' Tournisien i fait guinse et s' feimme i berteonne toudis autant quand i rinte.

On vous rattind l' diminche 6 mai pou intinte ç' que les p'tits infants i veont nous raqueonter.

À béteôt.

L' Grante vadroule.

Lexique : moutrer : montrer / rambile : gamin espiègle / orwettier : regarder / soyeu : scieur , casse-pied / bradé : chéri / écour : giron, genoux / coucoubaque : crêpe / payelle : poële / cruauder : enlever les mauvaises herbes / faire guinse : faire ripaille / berteonner : rouspéter