20 juin 2018 par L' grante vadroule

Chaque ainnée, in mai obin juhin, les visins d'ein quartier ou d'ein villache i seont invités à s'ortrouver insanne pou faire fiête. Ch'est l'auberche espagnole. Chaquein i ramène ein plat et eine boutelle. Cha, ch'est eine feos par an.

Ch'est là que t' veos pou l' prumière feos l' tiête du soyeu qui teond s' pelouse l' diminche à midi. Te découvères l' ceu qui t'invèye, pa d'zeur l'héyure, à t'in faire attraper les iéaux, les sintimints des saucisses de s' barbecue l' saim'di au soir. T'orconneos l' veox de ceulle qui bérielle comme ein mauviar les cancheonnes d'Édith Piaf in laichant s' cassis ouvère. Te n'oses acore trop rien dire et, comme ein soucard, te fais des risettes à tertous et te complimintes les madames su leu cuisine. Mais beon, te fais connissance. Infin, si on peut appeler cha connaîte, pasqu'à part d'minder à t' visin s' pétit neom, dusqu'i-habite et où qu'i ouèfe, te n'apprinds pos grand cosse. Hasard si te sais si i-est in ménache et si i-a d's infants.

Cha m' fait pinser au temps qu'i-a pos si léon, où l' vig'nache éteot eine institutieon. Te t'écangeos bin l' banjour. Te d'mindeos des nouvelles de l' famille, si les infants i-aveottent eu leu certificat ou leu diplôme, si l' grand garcheon i-aveot r'vénu de s' service militaire. À chaque feos, i-aveot ein bulletin météo dins l' discussieon. Si ch'éteot l' momint des courts jours, te chuffleos su tes deogts et te rintreos bin vite t' réqueauffer. In mars, te saveos si t' visin i-aveot planté ses penn'tières avant l' Saint Joseph. Ch'est aussi alors que t'apperdeos que l' mopère du cinsier dusque t'acateos tes oués i-aveot r'tourné s' brouette ; que l' fils du boutique de l' Grand plache i-aveot d'mandé l'intrée chez s' beonne amisse. I-éteot temps pasqu'i-aveot ein poriginelle dins l' tiroir et qu' cha c'mmincheot à s' vir qu'elle éteot in positieon. T'aveos tous les nouvelles sans devoir acater l' gazette obin orchevoir l' faire-part. Et si t'éteos à l' misère et qu' t'aveos b'soin d'ein queop d' main, te pouveos toudis queompter su l'ein ou l'eaute.

Après, avé l' vie moderne, l' télévisieon, les grands magasins et ... les contacts sociaux, comme cha s'appelle, in vrai, t' n'as pus eu d' vrai contact.

Tout i-est pourtant pos perdu. I-a des quartiers qu'i-orfeont ducasse ou brocante, des villaches avé des comités pou zieuter si i-a pos des gins qui trach'tent avé ein drôle d'air. Dins l' feond, on est in train d' faire marche arrière. Ch'est seûr'mint cha l' progrès. Et ch'est alfeos bin ainsin.

L' grante vadroule

Lexique : héyure : haie / attraper les iéaux : saliver / sintimint : odeur / berler : crier / cassis : fenêtre / soucard : hypocrite / léon : loin / vig'nache : voisinage / penn'tière : pomme de terre / oué : œuf / ortourner s' brouette : décéder / deminder l'intrée : se présenter comme fiancé / poriginelle : polichinelle / ête in position : être enceinte / zieuter : observer / tracher : errer