5 juin 2019 par Pichoulit

 
Ainsin mes gins comme vous eautes tertous, j'ai été voter diminche au matin.

Final'mint, mi j'trouèfe que ch'est eine beonne occasieon d' sortie. I f'seot bieau, seur qu'on a attindu eine milette et même pusqu'eine d'ailleurs, mais ch'est l'occasieon d' rincontrer ses visins, ch'est comme eine sorte d' fiête des visins si on veut. I d'a même ein paire qui d'in profitent pou sortir leu tchien.

Adeon, mi j'aime bin d'aller voter.

Seur que si i-areot cati des seaux et qui-areot eu eine beonne drache, j'areos pététe pos dit l' même. I m'areot follu attinte dins l' cour de l'école ou bin pa d'zous l' préau comme i dis'tent les institutrices à les infants quand i pleut mais j'areos pos pouvu quand même sauter dins les flaques d'ieau comme i feont d'habitute les infants dins des cas parels.

N'impêche, mi j'aime bin d'aller voter.

D'abord pasque ch'est l' signe qu'on vit dins ein pays démocratique et malgré tout quoi ç' qu'on dit, on a core l'occasieon d' timps en temps deonner no n'avisse, même si i-est pos seur qu' les politiques i veont vraimint in t'nir queompte

Tertous i sait qu' ces gins ch'est à eusses qui pins'tent d'abord, pos tertous, j' veux bin mais i d'a quand même eine paire ainsin. Rien qu'à vir l' nombre d' queops qui z'eont mis leu tiête dins les gazettes pindant l' campane, seur qu'i tienn'tent à leu plache.

Et in puque, cha n' deot pos ête pou rien mais avé l' salaire qui z'areont eine feos élus, i n' feaut pos s' faire d' bile pou eusses, surtout si i seont à l'Europe.

Mais i-a acore ene affaire qui m' carmousse. Su tous les listes, ou presque tous, i d'a qui eont d'mindé d' voter pour eusses et qui, in même temps, i-eont dit qu' si on voteot pour eusses eh bé, i n' prindreot'tent pos l' plache. Va t'in comprinte ...

N'impêche, mi j'aime bin d'aller voter, j'ordis acore ein queop.

In puque, cha m' permet d'ortourner in infance. Ouais, pouvoir ainsin faire du coloriache et sans dépasser, et si t'as pos mis tes leunettes, ch'est pos gagné.

Cha m' fait aussi busier alfeos à l' visite médicale, te t'infermes din eine camuche comme quand te deos aller faire pipi pa d'vant l' docteur ;

Comme in puque te t'ortrouèfes dins eine école, t'orviens in infance.

L' cour de récréation, l' préau, les coloriaches, l' cabine de visite médicale et in puque... t'as ein bulletin... d' vote.

Et si on wardereot c' beon sens de l'infance...

Mais l' principal ch'est quand même l'occasieon qu'on deonne à tertous, les vieux, les jeones, les riches, les péaufes, les malins, les ein p'tit queop moins malins, les gins de l' ville, les ceusses du villache, tout l' société quoi....

Adeon, ouais, i feaut aller voter et mi... j'aime bin d'aller voter.

Pichoulit