11 mars 2020 par Codolette

Ahais, vous z'allez pos m' croire, z'allez pétête caire in bas d' vo cayère, ou bin z'allez dire qu'i va caire ed'z'ours... mais sifet, pour ein queop, je n' vas pos démépriser, et j' direos même puque : ej' vas dire du bin !

J' vous esplique : comme ej' sus-t-eine vielle feimme qui c'mminche tout douch'mint à avoir ed'z'innuis d' santé d' tous les côtés, i m'a follu aller eine paire de jours à l' clinique, dins ein service qui s'occupe de m' cas. Mi qu' j'ai toudis trouvé qu' les hôpitaux ch'est lugubre et qu' cha pue, qu' les infirmières ch'est alfeos désagréape, qu'on n' veot jamais ein docteur, et que l' minger i n'est pos fort appétissant, hé bé ichi j'ai vu tout l' cantraire.

Et j' tire m' capieau (toute faceon, je n' d'ai pos) à tous ces gins qui z'eont bin de l' patieinche et du corache pou s'occuper des gins comme mi, pasque vous s' doutez bin qu'in puque, j' n'ai pos toudis été agréape ! Mais comme j'ai vu acor pus pire que mi dins l' champe d'à côté, j' m'ai dit qu'i falleot faire ein effort de gintillesse. J' saveos qu' je n' resteos là qu'eine paire de jours, adeon ch'éteot pos ein grand sacrifice.

Dins ceulle clinique, j'ai vu des infirmières avé l' sourire, toudis prêtes à rinte service, même quand ch'est pour des tâches (ch'est l' cas de l' dire) ingrates. Des docteurs qui prenn'tent leu temps pour tout bin espliquer. Ein chef infirmier souriant, qui n'hésiteot pos à v'nir vir si tout i-alleot bin. Ein jour, i m'a même pris dins ses bras pou m' mette su l' fauteul roulant ! J' m'ai r'vu, toute rose, i-a chinquante ans quand l' pétit Julot i m'aveot intrepris à l' ducasse de Saint-Antouane. Mais à m' meote que j'aime acor mieux l'infirmier pasque ç' diale d' Julot i n' m'a pus jamais donné d' nouvelles après ceulle soirée.

Cha y est ! Cha m'orprind, i feaut que j' déméprisse ed' nouvieau. Mais i n'a pus bramint d' plache, adeon j' vous dis « à l' feos qui vient, pour ein nouvieau déméprisache » !

Codolette