18 mars 2020 par Pichoulit

I-a pos à dire mais i-a des queops dusqu'on s'déminte dins queulle société qu'on vit.

Que t'soiches jeone ou bin vieux, les problèmes i seont les mêmes : pétit, te deos t' batte pou trouver eine plache dins eine crêche et vieux, bé, ch'est pou trover eine plache dins ein home qu'i t' feaut t'inscrire bin à l'avanche.

T'as à peine qu'minché t'n'existince que d'jà l'société, elle se fout pos mal de ti et au bout du parcours, ch'est toudis l'même jeu, débroull'-te...

T'es jeone parint, débroull'-te pou tes p'tits rambiles, et eine paire d'ainnées après, t'orcomminches, pou tes parints ç'queop-là et ch'est d' nouvieau débroull'-te.

Te vas ouvrer à Bruxelles, si te prinds l' train, eine feos qu't'es d'dins quand te n't'as pos ingélé eine demi-heure su l'quai in pleine couture, t'es pos acore seûr d'arriver à t'n'ouvrache à temps. La SNCB elle dit qu'elle cache après eine solutieon, l'ceulle qu'elle a trouvée jusqu'asteur, ch'est d' supprimer des trains à les heures de pointe, comme qui direot ch'est du surréalisme à la belche, i t'reste eine queosse à faire : débroull'-te.

Te veux aller querre des liards au guichet à l'poste ou bin à l'banque, pus questieon d'ête servi, te deos aller à l'machine et si t'as pos tes leunettes ou qu't'es pos treop habitué à ç' bazar, tant pire...débroull'-te.

On t'dit qu'ch'est pus pratique d' faire tes queomptes par internet, t'ov'là avec eine machine dusque t' deos mette des codes in veux-tu in ov'là, t'es là tout seu pa-d'vant t'n'ordi, t'as qu'eine queosse à faire...débroull'-te.

T'facture d' téléphone elle est pos jusse, adeon te téléphones à Belgacom, t'as dreot à passer d'l'ein à l'eaute, même que t'as dreot à de l'musique pindant qu' te poireautes et quand infin, i d'a ein au bout du fil, te n'comprinds pos quoi ç'qu'i t' veux, adeon...débroull'-te.

T'as du mau à comprinte tous les papiers qu't'orcheos pou les contributieons, l'familiale, l'mutuelle, t'pinsieon ou tout plein d'eautes affaires qui t'impoiseon'tent t' quotidien, qu' t'as des rappels ou bin des rectificatifs quand ch'est pos des lettes orcommandées (que l'facteur qui n'est pos habitué i-a même alfeos déposé chez t' visin ou dins l' rue d'à côté), quand t'as essayé d' lire et d' comprinte, t'as pus qu'eine queosse à faire pou solutieonner l'affaire, débroull'-te.

Mais l' pus pire de tout, ch'est quand t'as passé t'vie à faire t'n'ouvrache du mieux qu't'as pouvu et qu' du jour au lind'main, t' boutique i serre pasque on a décidé d'orgrouper les services ou faire d'z'écolomies, te t'ortrouèfes su l'carreau et ch'est l'cas de l'dire comme ein qui-a perdu s'quinzaine, seûr qu'au début tertous i t'plaint et même i s'occupe eine p'tit queop d' ti mais après...débroull'-te.

Te veos tout au leong de t' vie, t'arrêtes pos d' cacher eine solutieon bin souvint tout seu, ch'est ein meot qui-orvient toudis, débroull'-te...

Pichoulit