26 août 2008 par L’Orculeot 

Cha ch’est z’ouvrache ! I n’a pos ein jour qu’on ouvère eul’ gazette,  qu’on n’ parle pos des mêmes z’affaires !

Quand ch’n’est pos de l’grèfe de la faim ou des acrobaties des « sans papiers », ch’est d’l’ imbécilité d’nos visins du nord qui cro’tent qui n’a que l’ flamind qui queompte. Quand ch’n’est pos des expulsieons des z’étringers qu’on dit qui n’aveot pos d’raiseon d’les foute déhors, ch’est  des tornates, des trimblemints d’tierre et des accidints d’ trains et d’avieons.

Mi j’ trouèffe qu’on n’ parle pos assez de m’visin Roger ! « Roger ? » vous z’allez m’dire..  « pourquoi qui faudreot parler d’li   dins les gazettes ? » Et bé ch’est simpe : paçque  des Roger , i d’a des chintaines de milliers in Belgique..Acoutez ! Roger i-a  45 ans, i-a perdu s’n’ouvrache i-a deux ans . I-a trois infants et s’feimme i n’ouèffe pos ! I-a fait tous les boutiques de l’régieon et i-a même été pus leong pou li trouver d’ l’ouvrache mais cha n’s’arrinche jamais paçque ç’qu’on li proposse comme quinzaine cha n’dépasse pos bramint es’ chômache .

Et Roger i s’fait de l’bile, paçqu’on dit que ch’t’ein dreôle et ein fate. Pourtant i aim’reot bin ortrouver d’l’ouvrache, orprinte es’carette tous les matins et faire  comm el’z’eautes. Mais final’mint qui qu’ch’est l’  dreôle ? Roger ou les ceusses qui li propos’tent  d’l’ouvrache à mitan pour rien !

L’Orculeot

< Précédent		Suivant >