Semaine 1  2007 par Toinette

Cha z’y est : nous ovlà acor beonnes pour ouvère eul’ porte-monnaie du ménache !
Je n’vous apperdrai rien in vous disant que l’pain i-a ‘cor aurminté. D’après m’boulinger, ceulle aurmintatieon elle est tout justifiée de l’prix que l’fareine i meonte. Qui soitte ! Mais l’ceu qui n’intind qu’ein seon, i n’intind qu’eine cloque aussi… Alors j’ai été dare-dare d’mander à m’cousin qui-est cinsier quoi c’qu’i-in pinseot. Là, eul vint i-a chufflé eine eaute cancheonne.Em’ cousin i troueffe que ch’est ein scandale, asque l’marchand i li acate es’ blé moins tchier que l’année passée. Alors, allez comprinte ein’ séquoi à c’mic-maque ? Pourtant j’ai toudis appris que l’fareine, cha s’féseot avé du blé ! Neon ?..

Si i n’aveot qu’cha ! Mais l’reste i n’est pos mieux …T’nez : les côt’lettes i seont asteur au prix du rosbif, et li, pour in minger, i feaut des dints in or !…Si vous voulez faire des écolomies, n’vous avisez pos d’acater du bouli : cha vous r’vient aussi tchier que du bifteck ! Là aussi, ch’est l’même jeu : eul boucher i dit qu’i n’in sorte pus et l’cinsier i s’démène , pasqu’i vind ses biêtes trop beon marché !..Du queop, j’sus t’in train de m’demander dùsque les bénéfices i s’in veont ?.. Probablemint dins l’poche des ceusses qui z’acatent et qu’i vind’tent sans même vir eul marchandisse ! Seul’mint, à la fin du queompte, quisque ch’est
qui casque toudis ?! Ch’est l’consommateur !

Puisque ch’est la grand’ mote asteur, pourquoi c’que nous-eautes, les ménagères, on n’f’reot pos grêfe ? I n’a rien qui nous impêche de déquinte dins l’rue, avé des pancartes et des caliqueots…Cha n’ s’est jamais vu mais i n’est pos trop tard pour commincher. I n’vous feaut pos busier qu’ein jour les prix i veont baicher..Pour cha, vous pouvez faire eine belle croix d’ssus ! Je n’sais pos si vous s’rapp’lez qu’i-a deux dizain’s d’ainnées, les pennetierres i seont dev’nues à prix d’or et, qu’par conséquince, les marchands d’frites i zeont rouspété qu’i n’gagneot’tent pus assez. ? On leu z’a deonné raseon  et l’apquet d’frites i-a meonté à quarante francs !… Mais i n’a pus jamais déquindu, malgré qu’les penn’tierres i seont à ein prix tel, qu’on peut les ruer à l’tiête de l’ein l’eaute,… comme les gilles de Binche avé leu z’oranches amères…

Toinette