Semaine 2  2007 par Pichoulit

Dins ceulle périote de l’ainnée, je n’peux pos m’impêcher de m’raminvrer les nouvel ans d’avint, du temps dusque j’éteos acore infant.
J’orveos d’ein  seu queop les matins d’hiver du temps qui aveot acore de l’neiche pasqu’on n’aveot pos acore détraqué l’couche d’ozone.
On alleot d’beon matin étrenner s’parrain et s’marraine ou les vielles matantes à l’eaute bout du villache et on diseot s’complimint avant qu’les parints i n’beottent  eul pétite goutte qu’on alleot quère dins ein bocal à l’cafe et dusque les cérisses elle surnageotent dins l’arcole. Cha récauffe qu’i-diseotent mais nous eautes les gamins on n’d’aveot pos dreot sauf alfeos eine toute pétite goutte jus pou sintir el goût. Mais on s’rattrapeot su les galettes toutes fraîques bin fourrées à l’castonate qu’on aveot fait la veille au soir sur les fers à gauffes qu’on placheot su l’étufe au carbeon. Milliards que ch’éteot beon !

Asteur on n’a pus vraimint l’temps d’aller vire ses amisses même pus d’leu inveyer eine carte, ch’est vite fait qu’on leu espédie ein « mail » avec eine imache toute faite ou acore pus court, ein SMS. Et pou les galettes ch’est bin souvint des bazars tout faits que t’acate dins les magasins et qui n’eont même pus l’naque de l’pasienche qu’i-a fallu pou les cuire.

Adeon, mi j’voudreos ichi profiter d’ceul artique pou vous souhaiter à tertous eine beonne ainnée rimplie des joies d’tous les sortes, eine ainnée d’paix si ch’est core possipe, eine ainnée d’sérénité dusqu’on pourreot printe du temps pou tous les ceusses qu’on aime, qu’on arrêt’reot d’queurir perdu après des bernettes pou s’ortrouver à l’essintiel.
Eine ainnée d’fiête et d’espoir même si l’ambiance  à l’intour elle n’est pos toudis des pus réjouissantes.
In parlant d’fiête, cha va ête eine sapré , savez pasque à l’fin de ç’t’ainnée 2007, eul 27 de décimpe exactemint, bé ch’est les chint ans du cabaret et l’début d’eine eaute ainnée avé bramint d’grantes festivités, adeons apprêtez vous eautes à faire el fiête…

Et, in attindant, eine beonne ainnée acore à tertous.

Pichoulit