Semaine 3  2007 par Arnitoile

Ch’est dins l’usache, à l’occasieon du nouvel an, on présinte ses vœux dins les interprises et les administratieons. L’patreon, i-in profite pou saluer ses imployés et ses ouverriers, les féliciter pour l’traval qu’i z’eont fait l’ainnée qui vient d’s’écouler et dire qu’i d’ara acore puque l’an qui vient.

Même l’évêque i-a ornoué avec eine incienne traditieon et i-a invité du bieau meonte à l’évêché pour li présinter ses vœux. Ch’est m’viseine qui m’a tout raqueonté vu qu’elle ouèfe là comme technicienne d’surface et qu’elle a tout ravisé in much’ mac.

Cha s’passeot dins l’grand saleon d’réceptieon de l’évêché, dùsque ch’est tell’mint bieau qu’on essuie treos feos ses pis avant d’rintrer. Pou bin s’faire vir des Tournaisiens, l’évêque i-aveot fait servir du Tournaisien, l’apéro bin connu de l’maseon Six.

L’tout Tournai i-éteot présint, eul Bourguémette in tiête avé ses éch’fins, infin du moins les ceusses du CDH ; i-a tout l’même eulle blondine Ludivine qui-a fait eine intrée ormarquée avé Paulo, infin j’veux dire l’député Paul-Olivier Delannois. Elle imbracheot tout l’meonte, du moins presque tout l’meonte pasque m’viseine elle n’a pos vu si elle aveot osu imbracher l’évêque. I-aveot égal’mint des parlemintaires de tous les partis ; même eul bourguémette d’Ath i s’aveot déplaché malgré qu’li, i n’aveot pos mis s’bieau costume du diminche.

I-aveot égal’mint les huiles du meonte judiciaire tournaisien , eul nouvieau commandant d’plache qui s’ra déjà muté d’ichi eine paire de meos et qui-ara jusse fait eine apparitieon d’quelques meos à Tournai ; dins ein coin, l’commandant Mondo, i raqueonteot l’queompte avec Monique Willocq, acore tout in foufiête du karaoké qu’i-aveot fait avé s’confrérie des Bourguémettes ; au mitan des huiles de l’province, i-aveot eul nouvieau député provincial Serche Heustache – asteur on n’dit pus député permanint, ç’qui n’vouleot rien dire, puisque l’an dernier on a réussi à décholer deux députés soi-disant permanints. –

Par queompte, étrang’mint, i n’aveot personne de l’Maîtrisse de l’Cathédrale, même pos l’présidint ou l’maîte de capelle ou acore l’présidint des Amis de l’Maîtrisse. Pour mi, l’Maîtrisse de l’Cathédrale, elle n’est toudis pos acore in odeur d’saint’té à l’évêché…

Dùsqu’i d’aveot bramint d’orprésintés à ceulle fort belle réceptieon , ch’est les gins du meonte associatif tournaisien; m’visaine, elle a orconnu parmi d’z’éautes eulle présidinte des Longs Tchus du Mont St-Aubert, eul présidint de l’processieon, eulle conservatrice du musée d’folklore. Même l’roi carnaval 2006, i-éteot présint, sifet, sifet ! Et bin seûr Georches Toubeau et André Gosselin des Amis d’Tournai, qui-eont proposé à l’évêque de l’leommer Chevalier d’la Tour. Ch’ainsin qu’dins s’discours, l’évêque i-a dit qu’s’sinteot vraimint bin à Tournai – bé i minqu’reot pus qu’cha qu’i direot l’contraire ! – et qu’i-accepteot volontiers s’lominatieon. Adeon on l’voirra in juin prochain pour eine feos avec éaute cosse su s’tiête que s’mitre d’évêque. I-ara des photos à printe !

Et comme i-aveot l’vice-présidint du Cabaret Walleon, l’évêque i-a même ajouté qu’i-aveot li-même ein humour grinçant, ch’éteot ein trait d’famile, et qu’aussi bin à les p’tits et les grands cabarets que dins Passe-Toutoute, on pouveot continuer à s’foute d’li et qu’i-aimeot bin cha. Bé s’i supporte l’riache, ch’est qu’i-est dev’nu ein vrai tournaisien. Et on l’voirra p’tète s’rappliquer à ein prochain p’tit cabaret. Tins, cha cait bin, les prochains i z’eont justemint lieu les 20, 26 et 27 janvier à 20h à l’halle-aux-draps.

Arnitoile