Semaine 27 2010 par L'Infant d'Tournai  

Bonjour, savez, mes gins.

Je n'sais pos si ch'est l'effet de l'Coupe du Meonde, et des matches qu'on veot tous les jours, mais l'nuit passée, j'ai fait ein fameux rêfe!

Aussi i feaut que j'vous l'raqueonte. Cha s'passeot ein diminche dins l'chité du Maroc. Savez, au bout de l'rue Adophe Prayez. Ch'est là qu'on jeuot l'derby inter l'Unieon et l'Racin'. Ahais, mais in provinciale pasque les inciens dirigeants et supporters des deux clups, défoutus de n'pus vir des jeones tournaisiens dins l'équipe du Fotbal Clup, i-aveottent orcréé les deux frères enn'mis d'dins l'temps, les Rats et l'z'Infants.

Et comme avant, les jeueux d'l'Unieon i jeuottent in rouche et vert, et les rats in guéaune et noir. Eusses, i f'seottent leus matches su l'terrain Prior.

Et pou leu prumière saiseon, les deux équipes i s'défindeot'tent fin bin vu qu'i z'éteottent in tiête à égalité d'points à deux matches de l'fin du championnat!

Et in puque, ç'qu'i nous f'seot plaisi, ch'est qu'dins les deux camps, i n'aveot qu'des gins de l'régieon. Et cha créeot d'l'ingouemint.

Mais qui ç'qu'i-alleot monter ? Cha pourreot bin s'décider à l'fin du derby!

Falleot vir cha les gins qu'i-aveot dins l'Maroc!

Et ç'qu'i feaut aussi ajouter, ch'est qu'i n'aveot qu'deux agints d'police autour du terrain. Pos b'soin d'quévieaux et d'gindarmes à l'pelle comme au Luc Varenne!

Comme dins l'temps, on aveot r'formé deux fanfares et on ortrouveot l'ambiance des derbies des années septante. I-aveot pus d'mille perseonnes et cha berleot d'tous les côtés: «Allez l'Unieon» «Allez les Rats».

On d'aveot des frisseons dins l'deos. A l'mitemps, ch'teot toudis 0-0. Marcel Rouneau, l'intraineu des Infants, i-aveot mis au point eine tactique pou qu'les Rats d'Jules Devos i n'soich'tent pos dingereux. Et cha marcheot fin bin.

L'gardien unioniste i-aveot d'vu intervenir ein seul queop, su eine tiête d'ein attaquant guéaune et noir.

Mais vlà qu'à dix minutes de l'fin du match, alors que l'ambiance elle meonteot acor d'ein cran, l'ovlà qui dégache l'balleon dins les pieds d'ein d'ses attaquants.

C'ti-chi i-a mis deux définseurs dins l'vint, i s'a présinté d'vant l'portier des Rats et i-éteot prêt à tirer... J'alleos d'jà crier GOAL! Mais... mais quoisqu'i-arrife ? L'arbite i-a sifflé ? I n'aveot pourtant pos d'féaute tout n'même ?

Ah neon, que j'sus biête, ch'est m'rével quiaveot seonné. L'match i-est bel et bin fini!

Dammache, j'éteos hureux comme ein gosse d'm'ortrouver dins ç't'ambiance et j'aveos rajeuni d'vingt ans.

Ch'éteot pétête du folklore mais on s'amuseot bin. Et j'sus désolé de l'dire, même si no nouvieau clup i jeue in deuxième divisieon, mais on n'ortrouèf'ra pus jamais l'émotieon qu'on connisseot quand ç'que ch'éteot l'derby. A l'époque, on n'parleot pos d'régie, on jeueot dins nos vieux states mais on s'y sinteot fin bin, on n'aveot pos b'soin d'dizaines de gindarmes, et nos jeueux i saveottent mouiller leus mailleots.

Ch'éteot pétête eine éaute époque, ch'est vrai, mais mi j'l'orgrette bin. Et j'pinse que je n'sus pos tout seu...

Allez, à l'feos qui vient, mes gins.

L'Infant d'Tournai