Semaine 32 2010 par Catoire  

«Au quinze du meos d'août, l'été est oute» comme diseot m'gramère!

Oute, infin presque, les aoûtiens i doiv'tent acor orvenir! Si ch'est comme l' chassé croisé de l'fin du meos d' juillet cha va ête bieau!

A m'meote qu'on va acor brûler des teonnes de mazout pou pos grand cosse! Comme si on l'orcheveot gratis!

Vinderdi oranche, saim'di rouche, et l'diminche noir! La France va acor ête champieonne des bouchons in treos couleurs!  Ch'est normal pou ein pays viticole d'avoir bramint d' boucheons mais tout d'même.

N' parleons pos des tourisses «volants», eine pétite grèfe par chi, ein avieon in panne par là. Pour eusses avec, les congés ch' n'est pos toudis l' rèfe! Et in puque, ch'est pos l' tout d' faire l' voyache, à l'arrivée cha n'est pos fini: campings tout pleins, champes qu' l'hôtelier a «oblié» d'ortenir par eximpe. Mais i-a mieusse.

J' pinse à' m' bieau-frère qui-a roulé treize chint kilomètes d' eine traite et qui pinseot ête au bout d' ses peines et bardaf, au bord du soir, i-a cait des grelons comme des balles d' ping pong.

Et s' toute nouvelle carrette elle est orvénue poquetée comme ène équeumette. Mais si vous passez à travers tout cha, i faudra acore vous déméfier de l' «tourista», des biètes volantes et piquantes, des serpints.

Infin vous arez compris qu' si vous orvenez ou si vous êtes orvenus intiers, ch't ein vrai miraque!

Adeon l'ainnée qui vient, si vous voulez passer des congés orpeosants et pos treop tchers, ein beon moyen: restez par ichi. Visitez no belle Wallonie Picarde avé ses catieaux, ses musées, ses brass'ries, luseotez tout au leong d' l'Escaut et avec les liards que vous n'arez pos dépinsés pou l'voyache eh bé... mingez des moules à gogo, et pou faire foncher, dallez boire eine paire de beons verres sur eine terrasse au solel (si si i-d'a alfeos).

Après cha, tout bénaisse, vous direz seur'mint comme no n'orgretté compagneon Anselme Dachy: «Pourquoi cacher bin leon l' bonheur qu'on a tout près ?

Estce que no beonne vielle ville ell' n'a pos tout ç' qu'on rêfe ?»

Catoire