Semaine 33 2010 par Pichoulit  

Tertous i-a seur'mint acore dins s'tiête des souv'nirs inoubliapes d'vacances avé ses cousins. Ch'éteot l'pus souvint à l'Mer du Nord quand les Flaminds i z'accepteotent acore d'nous parler in français.

Infin quand j'dis tout l'meonte, ch'est pos tout à fait vrai, mi, j'n'aveos pos d'cousins de m'n âche, adeon, j'n'ai pos d'souv'nirs de cha mais quand j'veos l'plaisi qu'mes infants i-z-eont eu à passer huit jours à l'mer chaque ainnée avé leus cousins, je m'dis qu'cha deot rester dins les mémoires (mais pour mi, ch'éteot huit jours avec m'belle-mère et cha reste avec dins les mémoires, i n'a pos d'doute). Pasque l'famile, ch'est eine séquoi d'sacré et i feaut à tout prix l'garder précieus'mint.

C'qui est vrai pou les gins, ch'est vrai avec pou des communautés tout intières.

Ainsin, nous eautes les francophones d'Belgique, comme l'cat i-est dins l'horloche dins l'ménache avec les Flaminds qu'on est in ménache avec eusses d'puis chint quater-vingts ans (ch'est des noces de quoi ?), on s'rapproche de s'famile.

L' proche famile, ch'est nos amisses français de l'Picardie, i-z-eont non seul'mint l'même lanque mais aussi l'même parlache in patois et cha facilite les liens.

Mais tous nos cousins proches i seont avec dins toutes ces belles régieons d' France d'l'Alsace à l'Vendée in passant par la Corse, Caen ou Cahors et j'in passe.

On a core d'z'eautes cousins, mais eusses i seont in Suisse, et i doiv'tent aussi vife avec des ceusses qui n'parlent pos français. Apparemmint i s'in sortent mieux qu'nous eautes, pétête que les Suisses alémaniques et italiens, i seont pus souples et pus malins qu'nos Flaminds et qui n'eont pos ein Bart De Wever pou foute l'brin dins l'ménache.

Acore pus leon, i-a nos cousins du Québec. Ah, ces gins i z-eont du cran pou préserver leu lanque in plein mitan d'un territoire dusque l'Anglais i-a dreot d'chité.

Pasque no lanque, i l'défintent à tout prix, pos questieon d'parler d'e-mail, neon ch'est des courriels et ch't' ainsin pou eine série d'meots inglais qui seont proscrits pour garder no belle lanque, ceulle qu'a cantée Yves Duteil et qu'eont défindue des gins comme Félix Leclercq, Gilles Vigneault ou bin Linda Lemay.

Leu parlache i-est bin franconisé et imagé, on magasine quand on fait ses commissions, un bec, ch'est eine baisse et j'in passe. Même que l'meot «asteur» i-a l'même sens que dins no patois, i-a pos de hasard.

Pour avoir eu l' sanche d' découvrir ceulle tierre de francophonie avé des cousins français, j'peux dire qu'on a des l'ceons à y printe: i-a pos ein treo dins leus routes, i-a pos ein papier qui traîne par tierre, t'es in sécurité dins les villes (te peux laisser traîner t'sa, te l'ortrov'ras… mais cha, j'ai pos essayé) et surtout i seont fiers ed' parler français. Ouais, des cousins ainsin cha fait du bin.

Dammache qu'i seont si leon. Ch'est pos les Flaminds qui peuv'tent s'vanter d'avoir autant d'cousins qu'nous eautes, in France, in Suisse, au Québec et même bin ailleurs (cha m'rappelle eine cancheon d'Julos Beaucarne: «Nous sommes 180 millieons de francophones») d'jà qu'les Hollandais, i n'les compren'tent pos quand i seont sinsés parler l'même lanque.

Adeon, mi j'dis, merci, nos cousins et quand vous voulez chez nous eautes...

Pichoulit