Semaine 35 2010 par Pichoulit  

Eh, bé mes gins, j'ai eu l'esquite ichi pindint les vacances.

Vous avez intindu comme mi, qui a eine banque (s'neom i comminche comme «ingélé») qui a voulu mette au pas les gins d'soixante ans et comme j'vas béteôt l'z'avoir, j'ai bin eu de l'détoule. Hureus'mint, m'feimme elle est pus jeone, cha nous deonne ein p'tit queop d'marche de manoeufe.

Les banques i dis'tent que ch't'eine mesure sociale pou protéger les vieux (merci pou l'meot vieux). Qu'i soich'tent contints qu'les vieux i z'eont mis leu liards su leu queompte tout leu vie.

D'abord que les banques f'reotent dins l'social, ch'est nouvieau et cha s'sareot A leu plache, j's'reos puteôt modeste, d'jà qu'i z'eont eu b'soin des liards des contribuapes pou que l'gouvernemint i les saufe de l'faillite, cha devreot leu deonner ein p'tit queop d'humilité, mais ch'est pos l'ginre de l'maseon.

Adeon, je m'sus dépêché d'ortirer des liards de m'queompte pou pouvoir acore gâter mes infants au Noé et aussi pou payer l'pinsieon de m'belle-mère au home, comme on dit qu'les ortraits vont ête dégressifs et qu'elle va béteot avoir nonante ans, elle ne pourra pus ortirer qu'chint z'euros par meos...

Mais j'sus pos tout seu dins l'cas: ravisse no bourguémette, i va devoir aller minger au Quick avé l'éch'vin De Greef vu qu'i n'pourreont pus ortirer des liards assez du fait qui z'eont tous les deux pus d'soixante ans, et pindant ç' temps-là Lulu et Paulo i pourreont faire les grands restos vu qu'i seont pus jeones. Cha n'va pos arringer l'z'affaires politiques, i faudra qu'Rudy (neon, i n'a pos soixante ans) i les invite pou calmer l'jeu.

Pierre Bal avec i n'pourra pus ortirer des liards, mais li, i n's'ra pos privé, i n'fait pos beauqueop les restaurants.

Et Monseigneur Harpigny i s'ra obligé d'acater de l'piquette pou l'vin d'Messe.

Et no Roi Albert, commint qu'i va faire pou ses voyaches, li qui-a pus d'septante ans (donc i n'pourra pus ortirer qu'cheonq chints euros par sémaine). Et quand i-orchoit l'formateur, l'informateur, l'démineur, l'médiateur, l'préformateur, cha fait des frais, i va tertous les mette à l'ieau claire seur'mint.

Pindant c'temps là, l'sinistre De Wever i pourra s'goinfrer d'waterzooi et d'carbonates flamintes vu qu'i-est pus jeone, pétête même q'i pourra s'acater eine cravate...

Et Fabiola (quatervingts ans donc deux chint chinquante euros par meos seul'mint à ortirer si cha cait), commint qu'elle va faire pou acater ses capieaux ?

On s'imagine pos l'détoule que ceulle mesure elle va faire. Même l'pape, i-est obligé d'faire payer l'intrée à ses messes pou avoir des liquidités, vu que l'banco di Vaticano elle va suife l' mouv'mint.

Dis hardimint, à soixante ans, on n'est pus beons assez pou ces profiteux des banques !

Pourtant, j'peux vous l'asseurer: à soixante ans, on n'est pos fini.....

Pichoulit