Semaine 37 2010 par Catoupi  

Ch’est fiête !

Comme tous l’z’ans, au mitan du meos d’ sétimpe, ch’est fiête au Cabaret : l’ diminche dix-noué, cha comminche à nouèf heures, par ein hommache du Cabaret au Pichou Saint-Piat. Tout l’ meonte i peut v’nir canter avec eusses « Les Tournaisiens seont là » pa d’vant l’ fontaine, avant d’ormeonter à l’hôtel de ville.

Là, à dix heures, cha s’ra ein programme fort intéressant : après l’ meot du présisint (cha, on n’ peut pos y écapper) et l’ meot du bourguémette (on n’ voudreot pos rater cha), on pourra acouter madame Colette Nys pour eine pétite causerie et l’ groupe Osmose pour ein p’tit tour de chant.

Après cha, cha s’ra l’ormisse des prix du Concours Prayez.  Les gins qui z’eont gagné ceulle ainnée, ch’est : Laurence Lacante (prumier prix), Vincent Cuignet et Michel Lepoutre dins l’ prumière divisieon.  Dins l’ deuxième divisieon, su l’ sujet imposé « Ch’est l’ momint d’in parler », ch’est tout d’z’habitués du concours qui z’eont gagné : Marie-Astrid Ghislain elle a eu l’ prumier prix, suivie par Alexandra Caufriez et Henri Vivier.

Les ceux qui z’eont eu ein prumier prix i veont canter leu cancheonne, et après cha i-ara eine séance de cabaret par les cancheonniers de l’ Compagnie. Et j’ vous anneonche eine toute grante surprisse !  Les fidèles du Cabaret i n’ veont pos in r’vénir !  Mais comme ch’est eine surprisse, je n’ peux pos vous in dire puque, sineon l’ ceu du Cabaret qui m’a fait l’ confidince i va m’in vouloir tout m’ vie.

Et comme toudis, après l’ séance des photeos, on pourra aller boire el’ verre ed’ l’amitié avé les cancheonniers.  Et eusses i continut’tent après cha par ein p’tit banquet.

Adeon, faites comme mi : écrivez dins vo n’aginda à l’ date du dix-noué sétimpe : ch’est fiête au Cabaret !

Catoupi