Semaine 9  2007 par Pichoulit

Asteur que l’hiver i-est oute (acore qui n’est jamais vraimint arrivé au point qui- a des restaurants qui pinsent faire ein barbecue pou l’réveilleon l’an qui vient), on peut busier à ruer jus l’bonheomme hiver et fiêter l’carnaval. I d’a d’jà eine paire qui eont pris l’avince ainsin à Kain, dusque les rambiles i  seont toudis gâtés pa ein carnaval qui est pou eusses.

Mais in attindant l’ceu d’Tournai , i-a ein fameux évén’mint qui va s’passer l’sémaine qui arrife. Ouais, te l’as d’viner, ch’est l’cirque. Te m’diras que du cirque on n’d’a eu assez au soir du huit d’octope, d’accord mais ichi, ch’est avé des vrais artisses. Que même nous eautes à Tournai, on est gâté. Ravisse seul’mint : i-a l’clown Castonate qui amuse l’gal’rie,  t’as core du cirque dins les écoles avé eine compagnie qui n’fait béteot qu’cha et que ch’est même l’libraire d’ Sainte Magritte qui s’occupe d’eusses, t’as acore l’patreon du cirque d’Monaco qui vint aussi d’par chi. Alors te pinses, qu’in matière de cirque, on s’y conneot. Pasque ch’est pos tout t’as l’duo Benoît Devos et s’comarade Xavier Bouvier qui feont ein carrière internationale, t’as core Chloé Van Compernolle qui éteot piste d’or in 96 qui fait eine tournée avé ein spectaque d’trapèze. Ces treos artisses, bé, i vien’tent d’  « Mômes Circus », acore ein belle affaire qui-a dins no chité, eine sanche d’puque pou nos jeones grandir tout in f’sant eine séquoi d’bien. Pindant qu’les minisses i berliètent, eusses i ouèftent pou les jeones  Et l’piste aux espoirs, elle a pris comme on dit ein virache important pou rester ein vrai tremplin pou les espoirs et je n’te dis qu’cha, mes gins i s’y connaiss’tent pou donner du spectaque. Tins, leu patreon, i-a d’jà fait li même l’piste comme espoir quand i-éteot pus jeune, alors i sait de quois qui cause. Asteur el piste, elle va s’passer tout partout dins l’ville et pu seul’mint su l’plaine dusque quand i pleuveot te pidouleos dins l’ bédoule. Neon, te d’aras à l’halle aux draps, à l’salle « L’ferniête » à l’rue des campeaux, à l’maseon de l’culture et acore dins deux chapitaux su l’plaine et su l’grand plache. Te n’peux pos les rater, te n’deos pos les rater. T’aras des spectaques pindint tout l’sémaine et tout partout.

Je n’sareos pos ichi tout décrire mais si t’ravisses No Télé ou si te lis l’gazette locale, t’aras tous les rinsenn’mints, même seûrmint que dins ceulle Passetoutopute  t’in saras ein p’tit queop d’puque.
Mais n’rate pos l’occasieon d’vir des vrais artisses, des artisses jeones qui feont du spectaque pou s’faire plaisi à eusses et à nous eautes sans busier aux liards. Pasque si te n’vas pos s’t’ainnée, te d’vras attinte deux ans avint d’vir acore ein spectaque ainsin et te risques d’l’orgretter. Même que si te m’vois là, te pourras m’in payer eine……

Pichoulit