Semaine 42 2010 par El Soyeu du bas de l'Cinsse  

Banjour, bansoir les gins.

J'éteos pourtant bin décidé à vous écrire eine belle bafoule. Et puis, au moumint de mette sur el papier tout ç' que j'aveos in tiête d'puis eine paire de s'maines, berdaf, pus d'idées, pus moyen de m' raminvrer eine séquoi, pus rien; ch'est ç' qu'on appelle chez l'z'écrivains ou les compositeux de cancheons ou d' musique, le trou noir: ej' m'ai ortrouvé pa-d'vant ein' pache blanque. J'ai eu bieau creuser mes méninches (ej' deos dire que je n' d'ai pos beauqueop): RIEN DE RIEN, pos ein meot, pos eine phrasse.

J'ai essayé de m' raiseonner in m' disant: ch'est pos possipe; hier au soir, t'aveos acor ed'z'idées plein t' tiête.

Mais quoisqu'i veont pinser tous les fidèles lecteurs qui-attintent avec impatieince leu gazette Passe-Partout pou vite cacher après l'rubrique Passetoutoute et lire leu chronique préférée.

Pasque ch'est bin vrai, cha n'est pos des carabistoules: i-a des gins qui m' l'ont dit: «Ah, lire tous les s'maines les tesques in patois dins Passetoutoute, ch'est du pur bonheur, ch'est de l'beonne humeur pou tout l' journée».

Mais adeon, quoisque j' pourreos bin vous raqueonter ? Vous dire qu'on n'a pos acor ed' gouvernemint ! A part les politiciens, cha n'intéress'reot personne. Et cha, on peut l' dire ed'puis eine paire de meos...

Vous dire que dins eine beonne semaine, cha s'ra l' Toussaint et qu'on va vir plein d'gins dins les chim'tières, que te t' croireos l'lundi de l' brad'rie in pleine ville, je n' sus pos seûr que cha intéress'reot aussi beauqueop d' meonte.

Vous dire que les infants veont déjà ête in vacances pour eine sémaine, i-d'a seûr'mint qui m'direont qu'i veont acor ête imbêtés pou trouver quéqu'ein pour t'nir les gosses pindant qu'i ouèftent.

Ah ! Cha y est, j'ai trouvé ein' queosse qui va vous intéresser ! J'ai eu l'occasieon d'aller à eine répétitieon du Cabaret Wallon pou leu prochaine revue. Milliard !!!, pou ç' que j'ai vu, cha promet !!! Vous pouvez aller les yeux serrés, vous n' s'rez pos déçus. In tous cas, mi, ch'est certain, j'irai à l' Maseon de l'Culture.

Qui sait, pétète qu'on s' rinqueontrera!!!

In attindant l' prochaine bafoule, à r'voir mes gins.

El Soyeu du bas de l'Cinsse