Semaine 11  2007 par Du beos d’chuque

Et bé l’ovlà i va folloir queusir .

Queusir que vous dites ! Tins vingt neoms ch’est que l’mi-carême elle n’est pos leong d’nous eautes et qu’du verdi au soir après avoir bin busié à l’affaire i nous feaudra printe el’ décision. Rife gauche ou bin rife droite. Et pourquoi tout cha ? Et bé tout sinsémint pasqu’à gauche cha s’ra l’paradis et qu’in face bé cha s’ra l’infier ! Mi j’in conneos ein qui n’va pos lusoter et que s’décisieon elle s’ra vite prisse,ch’est feu el’ Roy Pierre(Vanden Broecke) autremint dit « Bourguémette » .Savez bin ch’est c’ti là qui prétind mordicus que si te n’habites pos d’sus l’rife gauche bé te n’es qu’ein moinse que rien.Cha veut dire que les ceusses de l’rife droite bé ch’n’est qu’des biec-beos.N’impêche que pou l’verdi au soir bé cha n’li f’rea pos d’mal d’aller vir du côté d’l’infier quoisqu’on i trouèfe.

Asseuré qui s’ra tout estamperné d’vir que dins l’infier i-a alfeos pus d’amusemint que dins l’paradis et je n’s’reos pos ébeubi qui rinconte là d’dins ein d’ses comarates du Cabaret Walleon  qui m’a dit l’eaute jour qui préféreot d’aller in infier pasque ch’est là qu’i-aveot seûr’mint l’puque d’amisses.Infin c’jour là chacun i f’rea à s’meote et j’pinses bin qu’i-ara des diapes pou démucher les  anches du paradis et seûr’mint qu’au paradis i d’ara des dévoués pou faire caire les cornes des diapes dins les bénitiers. Mi comme j’ai du plaisi avec tertous bé j’pinse bin que j’vas d’aller vir des deux côtés pasque j’pinse que si te fais ein beon mélinche de tout cha bé te n’peux foque caire d’sus des amisses .

Et pou c’soir surtout te t’fais pos d’bile vis tout cha avec t’cœur.

Du beos d’chuque