Semaine 43 2010 par Catoire  

L' dossier du Peont des Treos i-orfait surface adeon. Et on nous orparle acor des deux plans possipes.

L'prumier, l' plan de l'Ville. On passe à côté du Peont des Treos pa l' rife droite et on in profi te pour faire ein bieau p'tit port de plaisance.

App'leons cha l' plan 'B' pasqu'i dis'tent qu'on ne l' f'ra pétête jamais. I coûte trop tchier et puis d'après les «espécialisses», les batieaux i veont avoir du mau à printe eç' virache à droite ou à gauche, cha dépind d' queu côté on vient éné. Mais mes gins, j' sus seûr qu'i n'eont jamais meonté d'su ein baquet d' leu vie hasard!

Et puis i a l' plan 'A', l' beon bin seur, l' ceu de l' régieon walleonne.

Et là, ch'est radical. On warde ein seul treo plus larque su les treos treos. Cha veut dire que no bieau molumint, l' fi erté d' no Chité, i va ête défiguré mes gins, défi guré à vie, vitriolé à l' grosse louche.  Et pos question même d' pinser à savoir l' neom du vitrioleur!

Et puis même si on l'attrap'reot, i-areot toudis bin ein avocat qui trouv'reot eine virgule qui manque ou bin eine séquoi qui n'a pos été fait à temps dins ç' dossier pou l' faire libérer.

Ch'est pos l' prumier queop qu'i parl'tent du plan «A» bin seûr mais jusqu'asteur, i n' vous aveot'tent pos tout dit, savez. C' queop-chi, on apprind qu'in puque de défi gurer l' Peont des treos, i faudra ormonter l' pont à pont, bé cha va ête bieau.

Adeon ch'est pos fi ni, i faudra aussi raboter l' quai Saint-Brice. Et bé milliards, raboter ceul quai! I n'est d'jà pos trop larque mais si on l' rabote acor, les gins i veont caire dins l'Esquéaut in sortant d' leu maseon! Mais cha mes gins les 'espécialisses' i s'in fout'tent bin pos mal! Tout cha, pou faire passer des baquets d' deux mille teonnes.

Et quand on ara tout amoché no patrimoine, on d'vra acor orcommincher pou faire passer des batieaux d' quate mille teonnes! Au mitan d' tout ç' déballache, j'ai quand même intindu eine séquoi d'intéressant.

I paraît que l' Peont des Treos i-appartient à tous les Tournaisiens. Et bé j' pinse qu'on d'vreot ête logique pour ein queop.

Avant d' démolir la mitan d'eine maseon, j' pinse qu'i s'reot quand même normal de d'mander l'permissieon des propriétaires et faire ein p'tit «référendum» comme on dit.

A vo meote!

Catoire