Semaine 45 2010 par Catoire  

Nouvieau projet d’hôtel quate étoiles à Tournai. On laiche caire l’ Tour Michelin et on orvient à eine séquoi d’ pus discret.

A l’ plache d’ l’Evêché on warde l’devanture des Inciens Prêtres. I n’aveot pos d’eaute solutieon, ch’t’ein molumint classé ! I n’eont qu’à nettier les murs, ainsin i z’areont bramint d’ subsides, ch’est toudis cha d’ gagné.

Du côté de l’ plache des Acacias, on va rimplacher les Archifes par eine espèce de bunker in béteon avec des p’tites ferniètes dins tous les sins. Si j’parle d’ bunker ch’est pasque ceul bâtimint va ête à mitan intierré.

Comme cha, l’partie in l’air n’s’ra pos pus heaute que l’ cathédrale. Dins l’ partie dins l’ tierre i-ara ein « spa », avec eine piscine, des saunas et tutti quanti. I paraît qu’ cha plaît à l’ clieintèle de ceul ginre d’hôtel de lusque.

Les promoteurs i présint’tent cha comme l’oué d’ Colomb mais les Romains i-aveot’tent d’jà fait eine paire de spas à l’ même plache, i a dix-siept chint ans ! I-ara cor ein restaurant et eine cafétaria avec vue imprenable sur Noter-Dame.

Infi n ch’a s’ra comme l’Panoramique mais in bas du meont.

I ara, bin seur, eine galerie avec des magasins. Et adeon tous mes gins à liards i n’areont pos b’soin d’ sortir d’ leu bunker à z’étoiles pou d’aller acater in ville ç’ qu’i n’eont pos b’soin.

Et si i-sortent quand même j’ leu souhaite bin du plaisi. Les rues du quartier s’reont orpavées mais i faudra toudis slalomer inter les brins d’ tchiens.

Su l’grand plache i jeueront à l’roulette russe in traversant l’ piste automobile et i pourreont toudis printe des neunettes d’approche pou cacher les magasin d’ lusque.

Et quand du lind’main i voudreont orpartir, i d’mand’reont au voiturier d’ l’hôtel d’aller querre leu carette. L’malhureux i d’vra queurir jusqu’à l’ rue d’ l’Hôpital Noter-Dame, déquinte dins ein garache souterrain et orvenir à l’détinte avé l’ingin.

Si i cait à l’ sortie d’ l’Ecole des Frères, l’ voyache risque d’ durer mais in attindant les clients i pourreont toudis déquinte à l’ cafe printe... ein spa.

Catoire