Semaine 46 2010 par Catoire  

Banjour mes gins.

Ch'est acor mi ! J'vous esplique. J'n'ai pos jeué dins l'orvue ç'queop-chi, adeon j'ai rimplaché mes amisses à l'écriture pindant eine paire de s'maines. Asteur mes gins i seont acor eine milette mates, adeon j' jeue les prolongatieons.

I seont mates, bé je l'comprinds pasqu' écrire eine orvue et jeuer d'dins, cha d'mande bramint d'ouvrache. Mais comme i diseot moneonqu' Ernest, l'traval cha paie toudis ! Mais beon, je n' vas pos ichi vous orparler d' no n'or'vue in détal, Etienne Boussemart i l'a d'jà fait dins la fouèle et seur'mint mieusse que j' pourreos l' faire vu qu' li i-est journaleu.

Et puis vous avez seur'mint v'nu vir el' spectaque.

Adeon, comme mi, vous arez eu l' queop d'coeur pour les sketches «infants admis». I-z-éteottent nué su l'scène, l'pus jeone ia chinq ans et l'pus «vieux» i d'a treisse. Mais attintieon, ceulle pétite troupe elle ouèfe comme des «pros». Pou les tesques, pos d'hésitatieons, pos d'à peu près, on sint qu' ch'est appris et répété à temps.

Et pou leus cancheonnes, ch'est parel. J'pinse que si tout l'troupe elle faiseot comme eusses, no souffl eusse elle s'reot seur'mint fi n bénaisse ! I-aveot treos sketches dusqu'i z'éteottent in costumes de scouts.

Des cancheonnes i d'eont canté treos. «Ein grand cerf» ch'est normal pou des scouts. Mais i-z-eont canté, in puque, eine cancheonne su l' politique à Tournai ! Là ch'éteot l' cleo ! Du jamais vu ! Intinte ces jeones meonter su l'gambe d'nos politiciens, cha vaut l' voyache, comme on lit dins l' guide Mich'lin ! Inter parinthèsses et inter nous, bravo à «Eléphant gris» l'auteur de l' cancheonne et bravo à «Guépard rapite», qui-a méné s'pétite troupe comme ein vrai chef... scout.

Bin seur, tout au leong d' ceulle deuxième cancheonne, tout l' salle elle rieot et elle batteot des mains. Mais jusse après, i-a eu comme ein cang'mint d' teon. L' leumière elle a diminué d'su l' scène, les infants d'Tournai i z'eont fait sisite avé leu chef et Eléphant gris, et tertous insanne i-z'eont canté eine cancheonne comme on cante autour des feux d'camp. Comme ch'éteot bieau !

Et à ç' momint-là, pus d'ein orwettiant i-a seur'mint orpinsé à s' jeonesse, j'd'ai même vu qui canteot'tent...

L' dernier diminche, à la fi n de l' séance, l'Cabaret a fl euri, in rouche et blanc, chaque madame de l' Troupe. Les infants, i-zeont orchu ein bieau life écrit in picard par no n'amisse Bruno Delmotte.

Adeon, tout d'ein queop, j'ai vu nué p'tits princes d'su l' ponteon...

Catoire