Semaine 47 2010 par Codolette  

Milliard qu'i m' fout l' barpe em' visin!

I n'arrête pos d' m'imbêter, et on n'peut rien li dire. Et quand on li dit eine séquoi, i-a toudis eine pièche à mette au treo.

Par eximpe, l'éaute queop, j' li dis ainsin qu'i s'reot temps qu'i queope l'hierpe dins s' gardin, vu qu' les pichoulits i commincheotent à avoir des s'minches.

I m'a répeondu ainsin: «j' n'in peux pos si i-a pleut et qu' cha pousse pus vite, tout n' même»! I-a cor attindu deux s'maines, à croire que ch'teot rien qu'pour m'imbêter.

Eine éaute feos, i-aveot de l' neiche su s' trottoir, et j' li d'mante quand ç' qu'i va déblayer. I m'a répeondu ainsin: «J'y aveos pos busié, ch'est vrai qu'i-a neigé mais ch'est pos de m' féaute et j' n'ai pos l' temps. Cha l'ira, cha fi nira bin par feonte».

Ein éaute queop, j' veos qu'i-a eine tuile de s' toiture qui berleoque et qui risqueot bin d' caire dins m' cour. Je l'préviens, et v'là ç' qu'i m'a répeondu: «Ch'est pos de m' féaute, je n' vas tout n' même pos grimper là, et vous n'avez qu'à n' pus passer là pa-d'zou. Et arrêtez d' m'imbêter avé tous vos bernettes, vous êtes eine maniaque à m' meote».

Feaut tout intinte!

Adeon, comme je n'pouveos pus rien li dire, ov'là que j' rinqueontre l'éaute visin, et que j' li raqueonte tout cha.

J' saveos bin que m'n'heomme i-alleot tout aller li raqueonter, vu qu'i seont comme cul et qu'misse. Cha fait qu'du lind'main j'ai eu l'éaute qui m'a rattaqué: «Quoi ç' que ch'est pou des manières d'aller taper su m' deos ainsin et d' raqueonter des mintiries ?». «Bé m' fi eu, qu' j'ai répeondu, j' n'ai fait qu'li dire ç' que j' t'ai d'jà dit, in busiant qu'li, te l'acout'reos pétête...»

Mais j'ai compris ç' jour-là qu'i valeot mieux laicher caire. Asteur, je n' dis pus rien. I-a des hierpes d'ein mête de heaut dins s' gardin et i manque eine vingtaine de tuiles à s' toiture.

In conclusieon, ov'là l' dicteon du jour: «Faites du bin à n'ein baudet, i vous quie au nez».

A béteôt pour ein éaute déméprisache!

Codolette