Semaine 49 2010 par Arnitoile  

Les Tournaisiens i n'saf'tent pus à quoi s'in t'nir les jours de marché!

Dins l'temps, ch'éteot bin simpe. Tous les semaines, les marchés i-aveotent lieu au même indreot, l'marché d'l'Imp'reur su l'Grand-Plache, l'marché aux fl eurs su l'plache des Acacias, l'marché aux légueumes su l'plache Saint-Pierre et l'marché aux volales su l'quai.

I-a foc qu'pindant l'karmesse d' sétimpe et d'mai, quand i-aveot l'foire, que l'marché d'l'Imp'reur i d'veot désalter.

Dins l'temps, et ch'n'est pos si vieux qu'cha, savez mes gins, i-a tout au puque eine dizaine d'ainnées, les Tournaisiens i pouveotent faire tous les marchés d'ein seul queop. De l'Grand-Plache 'squ'au quai, ch'n'est pos bin leong. On pouveot tout faire à pieds.

D'ailleurs les marchés ch'est fait pou qu'les habitants de l'ville i peuftent avoir des légueumes et des fruits frais pou toute l' sémaine. Est-ç'qu'on n'dit pos: les baudets d'Orcq ? Qui rappell'tent l'temps dùsque les cinsiers d'Orcq i v'neotent vinte leu productieon su les marchés d'Tournai, tout comme les maraîchers d'Kain d'ailleurs.

Ah mi je m'rappelle bin qu'au beon temps, combin d'feos j'n'ai pos rincontré des amisses au marché et on s'deonneot rindez-vous à n'eine terrasse su l'quai après avoir acaté eine paire de ribbetjes ou ein morcieau d'poulet rôti et qu'on partageot et dégusteot avé ses deogts in buvant eine beonne crasse pinte.

Asteur euç' temps, i-est oute; si t'veux acater un bouquet d'fl eurs, te deos aller 'squ'à l'plache de Lille et si t'veux des légueumes, ch'est à l'éaute bout de l'ville, pa-d'vant l'gare, qu'i t'feaut queurir ! Si t'veux faire tous les marchés, asteur te deos sortir eutte carette. Acor ein beon moyen pou essayer d'faire diminuer l' pressieon automobile in ville!

Et pos la peine d'aller t'garer su l'plaine des manoeufes, i n'a toute façeon pus d'navettes. I n'à qu'à Tournai qu'on veot cha, des marchés éclatés aux quates coins de l'ville! Nurvart ailleurs cha existe, eine ineptie parèle.

Evidemmint quand te vas au marché, i n'peut mau que t'rinqueontes l'bourguémette ou ein échefi n. Eusses, i n'saf'tent pos ç'que ch'est que d'faire ses courses au marché. I-eont acor décidé eine séquoi in dépit du beon sins, qui mécontinte tous les Tournaisiens du chintre ville.

Et comme i-a pus l'foire su l'Grand-Plache, i-a follu satisfaire les commerçants du coin, qui seont toudis à graigner, in créant sins cesse des animatieons; du queop l'marché d'l'Imp'reur, on l'inveot à l'plache Crombez et l'marché aux légueumes, li, à l'plache Victor Carbonnelle, pour les ceusses qui saf'tent dùsque ch'est...

Tout i-est acor ein queop chamboulé! Et ch's'ra comme cha d'puis fi n novimpe 'squ'à l'ainnée prochaine!

Mi, j'pinse que nos édiles, i leu manque alfeos du beon sins! Paufes Tournaisiens!

Arnitoile