Semaine 13  2007 par Catoupi

Au soir du mercredi des chintes (du lind'main du mardi-gras), j'ai été avé m' pétite famille au leong d' l'Escaut, pour eul "noyate des candelles".  Quoisque ch'est d' cha, vous allez m' dire ?

Bé ch'est assez simpe : i s'agit d' mette sur l'ieau eine planchette avec ed'ssus eine candelle alleumée, au momint que l' nuit elle cait.  Et pourquoi qu'on a été faire cha ?

Cha vient d'eine incienne traditieon du dix-nouèvième sièque, du temps qu'i n'aveot pos d'élestrique et qu'on s'éclaireot à l' candelle.  Au r'tour des bieaux jours, quansqu'on pouveot ouvrer à l' leumière du solel, et qu'on n'aveot pus b'souin d' bougies, les gins i z'alleottent mette les restes d' candelles sur eine pétite planque obin sur ein sabeot su l' fleufe.  Ceulle traditieon s'ortrouveot à Tournai, mais aussi in Lorraine et au Luxembourg; ch'est dire qu'i-a alfeos d'z'idées parelles dins d'z'esprits bin leon l'ein d' l'éaute !

D'après ein du Cabaret Walleon, on peut aussi app'ler cha l' "pourménate des acoulins", obin parler d' cand'lier d'acoulin.  Cha, ch'est pasque dins l' temps, on faiseot t'nir eul candelle su l' planchette avec ed' l'acoulin, ein genre d'argile obin d' boue.

A Tournai, cha fait eine beonne dizaines d'ainnées qu'i-a eine confrérie d' carnaval qui-a eu l'idée d'orlancher ceulle traditieon; pos pour in faire eine fiête ou eine beuv'rie, savez !  Jusse pour faire orvife ein p'tit momint d' poésie et d' féerie, tell'mint rare dins l' meonte d'asteur.

Et pour rinte eul traditieon un p'tit queop pus amusante pou l'z'infants, i-eont busié d'faire écrire ein voeu su l' planchette, et qu' si l' candelle elle est acore alleumée in arrivant au Peont des Treos, eul voeu i d'vreot s' réaliser.  Cha ch'teot eine beonne idée pasque les p'tits rot'leots qui vienn'tent là, cha leu fait ein p'tit peo d' suspinse in puque.

Et les grands dins tout cha ?  Eh bé i s' prenn'tent au jeu comme les rambilles, et in puque de tout cha i feont eine pétite pourménate au fil de l'ieau... cha leu fait vraimint du bin, à m' meote !

Ainsin, si dins vingt ou trinte ans, j'intinds quéqu'ein dire : "quand j'éteos p'tit, j'alleos alfeos mette eine candelle à l'Esqueaut, et ch'éteot fin gai et fin bieau", j' pins'rai in mi-même : "Merci les Mouqueux d' candelles et les ArleKains, d'avoir ralleumé l' flamme sur l'ieau !"

Catoupi