Semaine 51 2010 par Pichoulit  

Eh, bé mes gins comme l'temps i passe, nous ov'là béteot au Noé, on n' s'a pos rindu queompte qu'on y arriveot.

I-a cor d'cha eine paire d'ainnées, tertous i désespéreot d'avoir ein Noé blanc tell'mint que l'temps i s'radoucicheot mais ç't'ainnée, l'neiche elle a pris tertous d'court, et si Noé i n'est pos blanc, l'z'eautes fi êtes i z'eont bin pris l'avanche, on a eu ein Saint Eloi, blanc, eine sainte Barpe blanque, ein saint Nicolas blanc et j'in passe. Neon pos ein Toussaint blanc, i n'feaut pos exagérer cha ch'est pou dins eine paire d'ainnées pétête.

Adeon, l'Noé cha n'ra pus eine surprisse si i-est tout blanc.

Tout cha, bé, ch'est la faute au dérèglemint de l'planète, même que les gins i-approuftent d'trouver eine solutieon pou sauver l'climat, et si i n'est pos treop tard, bé, i-est grand temps.

I feont des réunions comme ichi pou no gouvernemint, espéreons qu'cha s'ra pus rapite...

Et pour cha, on a mis les moyens, savez, tertous i-est parti à Cancun, au Mexique pou discuter l'affaire et l'Belgique, elle s'a pos gênée pou ête orprésintée, i paraît qu'on a là invoyé quate minisses et eine banse d'esperts, d'orprésintants d'tous les sortes, i-aveot là chint et huit belches!

Si on trouèfe pos eine solutieon avec cha, on n'in trouèv'ra pus.

Mais j'y pinse, si tertous i f'reot l'même i-areot bramint d'gins: chint quater-vingts pou dix millieons d'habitants in Belgique, cha f'reot pou les Français qui seont six feos pus nombreux pus d'six chints orprésintants et je n' parle pos d' l'Inde qui invoireot pus d' douze mille orprésintants ni même d'la Chine, i-areot là pus d'quatorsse mille chinois!

Si avec tout cha, on saufe pos l'climat, à moinse que tertous i deot printe l'parole, on n's'reot pos sorti d'l'auberche....

Et pindant qu'mes gins i berdèl'tent, i feont bombance (l'cantraire i s'reot étonnant), i us'tent eine masse de kérosène pour aller squ'à là (tins, j'pinseos qu'i falleot sauver l'climat), ichi in Belgique, i-a des gins qui seont ingélés pasqu'i n'a pos d'plache pou les mette à l'abri, pos d'liard pou s'cauffer ou pou minger....

Mais les minisses (les ceusses qui n'seont pos à Cancun) i dis'tent qu'ch'est pos d'leu feaute mais de l'feaute d'ein eaute (ch'est comme sur eine cour de récréatieon), qu'i n'a pos d'liards assez (tins, on a effacé l'dette de l'KBC... pourtant là i-a des liards; essaie toudis de t'côté de n'pos payer l'procès qu't'as eu pasque t'as pos mis des liards assez dins l'parcmète).

Dis hardimint, i-a vraimint eine séquoi qui n'tourne pus reond pou l'momint.

In attindant ch'est Noé. Et si on mettreot comme dins l'temps nos sorlets pa d'zous l'sapin pou d'minder des heommes de beonne volonté pou sauver l'climat, pou pinser ein p'tit queop à les ceusses qui n'eont rien, qui seont tout seu, qui n'eont pus d'ouvrache, pus d'espoir, pus d'liards, pou printe l'temps de s'parler, de s'comprinte et d'raviser insanne dins l'même directieon...

Tins, j'y pinse, on pourreot aussi mette nos sorlets pou qu'infi n (quand i s'reont tertous orvénus d'leu vacances à Cancun), i pins'tent à nous deonner ein gouvernemint mais là avec j'ai bin peur: i-a d'puis eine paire de meos ein sale gamin qui s'appelle Bart (neon, neon, ch'est pos Bart Simpson) qui n'a rien à foute de l' solidarité et qui est capape de voler les sorlets pou printe pou li tout seu tout quoi ç'qu'i-a d'dins...

Pichoulit