Semaine 15  2007 par Cyrano

Infin ! Cha l’y est ! L’printemps i-est orvenu !…Après ein hiver qui n’arrêteot pos d’bouder, on a ‘t é hureux d’ortrouver ein doux rayeon d’solel. Du queop, l’prumier diminche qui-a fait beau, m’femme et mi on in a profité pour aller faire ein p’tit tour à pied dins la campane. Et ch’t au détour d’ein qu’min que m’femme elle a rinqueontré eine « grante madame », ein de ses inciennes connaissances, du temps qu’elle alleot à l’école… Après les présintatieons d’usache (je n’l’aveos jamais vue mais j’sus pos près d’l’oblier !), l’grante madame in questieon elle nous a invités tous les deux à aller dîner l’diminche qui suiveot, dins s’maseon d’campane…et m’femme elle n’a pos su faire autermint que d’dire qu’awi…

Et ch’t ainsin qu’huit jours pus tard, on éteot fidèles au rindez-vous…Pindant l’apéritif (on n’a eu fauque ein verre, qui nous canche fort de nos soupers du Cabaret Walleon, dusqu’on d’a toudis au moins trois !), l’ex-amie de m’femme elle n’a pos arrêté d’avoir eul crachoir : elle a espliqué que s’n heomme et elle, i v’neot’tent tout jusse d’rintrer des sports d’hiver. Falleot l’intinte déblatérer d’ssus ses esploit à « Meugève » ! A l’in croire, i n’aveot eu perseonne pou li mette ! Dins l’grante déquinte à skis réservée à les dames,  qu’elle aveot rimportée, l’deuxième elle éteot à je n’sais cobin d’minutes !… Ch’éteot d’ein intérêt !… Pour deîner, - et pou rester dins l’ambiance des vacances -, on a eu de l’fondue savoyarte. Ch’n’éteot pos mauvais mais, inter nous,  j’préfère (et d’loin) ein beon p’tit ragoût d’mouteon avec des navets ou de l’blanquette de vieau…infin, soitte !…Et pindant tout l’orpas, elle a continué s’babillarte…Après l’dessert, s’n heomme i-a proposé d’aller pourméner dins les invireons. I-aveot des véleos pou tout l’meonte dins l’garache, et nous ovlà partis !

Mais l’grante madame elle ne nous a pos accompagnés, sous prétesque qu’elle aveot d’l’ouvrache : i li falleot mette d’l’orte dins s’maseon ; « C’est fou ce qu’il faut ranger quand on est parti pendant un mois, et j’ai horreur du laisser-aller !… » etc., etc… Pindant l’pourménate, pou l’prumière feos, j’ai vu s’n heomme sourire..i-aveot l’air soulagé.

Quand, du soir, on est rintré à no maseon, m’femme elle a dit :

-Te n’devin’ras jamais pourquoi c’qu’elle n’est pos v’nue avec nous –eautes, c’t après-deîner ?…
-Neon, qu’j’ai fait…
-Eh bé, ch’est qu’elle n’sait pos aller in véleo !…

Cyrano