12 janvier 2011 par El Soyeu du bas de l'cinse  

Banjour, bansoir les gins,

Ej' me souviens que quançque j'éteos p'tit rambille - i-a bin eine chinquantaine d'ainnée - au jour de l'an, el' prumière visite qu'on f'seot, bin avant d'aller chez les beons papas et beonnes mamans, ch'éteot, avé tous les cousines et les cousins de m'mopère et de m'mamère, aller souhaiter eine bonne année à eine vielle matante qui resteot rue As Pois (Malvina qu'elle s'app'leot, eine sainte...).

Adeon, on s'ortrouveot bin à eine vingtaine dins l'plache de d'vant. Nous eaut's, les p'tits, on aveot foqu' dreot à ein morcieau d'chucolat, mais les grands, ch'éteot l'goutte et l'café.

Et j'intinds acor l'moneonque (Alphonse qu'i s'app'leot) dire à ses gins: Attintieon! hein les infants, ch'est du café à quinse quévieaux et quatorse pou conduire l'ieau.

El' pauf'..., elle ne saveot pus où donner de l' tiête, au point qu'elle répéteot toudis: «Gardez chacun vo tasse et vo verre». Cha n' rateot pos!... Tous l-z'ans ch'éteot l' même ringaine: tertouss s'in alleot avé s' tasse et s' verre. Et tertouss i-orveneot du lind'main pour rinte el' vaisselle de l'matante; ch'éteot l'occasieon d'orboire eine goutte mais pos d' café tell'mint qu'i-éteot mauvais (cha ch'est ç'qu'i diseottent).

Après cha ch'éteot l' coutume: on alleot souhaiter les grands-parints du côté de m' papa à Obigies et là, j'éteos contint pasque j'veyeos tous les moneonques et les matantes et tous mes p'tits cousins et cousines.

L'orpas!..., ch'éteot toudis l' même, mais tertous attrapeot l'z'ieaux et avaleot s'lanque in buvant du bouilleon et in mingeant justemint de l'lanque de boeuf, à l'intrée, et du poulet comme plat d' résistance, que m' grand-père i-él'veot avec du beon grain et pos avé tous les pourettes qu'on donne à minger maint'nant à ces volatiles.

Pasqu'à l'époque, minger du poulet, ch'éteot ein plat d' lusque. Et s'i-aveot quéqu'ein qui-aveot acor faim, i pouveot toudis minger ein morcieau d' bouli que m' grandmère elle aveot fait cuire dins l' bouilleon.

Et puis, i jeueottent à l' manille in buvant eine paire de pintes (infi n quand j' dis eine paire de pintes !!!).

Mais l' pus grand moumint dins mes souv'nirs de p'tit rambille, ch'est quand l'grand-père alleot s'assir dins s' fauteul à côté du feu, qu'i-allumeot s' pipe et que m'grand-mère li apporteot les inveloppes..., les inveloppes du beon an, les écapures, comme on dit par chi.

Tous les p'tits-infants, mi compris, on f'seot la fi le pour orchevoir el sienne. Oh...! ch'éteot pos grand queosse, mais ch'éteot donné avé amour et cha je n'l'ai jamais oblié.

La-d'ssus, ej' vous souhaite à tertouss eine beonne et hureuse ainnée, mais surtout eine beonne santé.

Su ceull' beonne parole, banjour, bansoir les gins! Et à béteôt pour ein' nouvel' bafoule.

El Soyeu du bas de l'cinse