2 février 2011 par L'Infant d'Tournai  

Bonjour, savez, mes gins.

J' suposse que vous avez intindu parler qu'Dany Boon i vient d' sortir ein nouvieau fi lm. Et ç' qu'on espère, ch'est qu'i-ara bramint d' succès.

Ch'est vrai que l' douane ch't'ein sujet qui peut am'ner bin d'z'histoires tell'mint qu'i s'in a passé à les frontières pindant des dizaines d'ainnées.

Et tant qu'on y est, j' voudreos ichi vous parler d'Valentin qui d'meureot du côté de l'Glan'rie. Meon heomme, i-aveot tous les trucs pou li frauder. I n'a jamais ouvré de s'vie mais les liards i-eont toudis cait, ainsin sans misère.

Jusqu'au jour où l' douanier d'service, l' grand Gustafe, i-a été pinsieonné.

L' ceu qui l'a rimplaché, Jean-René, ch'teot comme qui direot ein p'tit mourdreu qui n'aimeot pos l' riache. Et intègre avec cha!

Et v'là qu'ein jour, no Valentin i passe à vélo l' frontière pou s' rinte à Mouchin. Jean-René i sort de s' cahute et i-arrête no n'amisse.

«Rien à déclarer ?» qu'i li d'minte. «Bé neon, qu'i répeond Valentin, vous l' veyez bin». «Je l'veos, je l' veos, pouvez m' dire ç'qu'i-a dins l'sa qui-est su vo vélo ?» «Ah, cha, ch'n'est rien, ch'est du sable».

L'douanier, pos convaincu, d'minte à Valentin d' détacher l' sa...et d' l'ouvère. C't'ichi i n'in orvient pos mais i s'éxécute. Et l' douanier, à s'n'aisse, i met s' main dins l' sable pou vir si i n'a rien d'dins. «Ahais, qu'i dit pourtant pos rasseuré, vous pouvez passer».

Et v'là Valentin qui-ormeonte su s' véleo in chuffl otant et passe l' douane fi n bénaisse.

Treos jours pus tard, l'ov'là qu'i s'amène, toudis à véleo et ... avec ein sa d' sable. L'douanier, l' veyant arriver, i rapplique in espérant d'in savoir puque ceulle feos-chi. «Toudis rien à déclarer, j' supposse ?» «Bé neon, du sable, comme l' feos passée, tins». Jean-René, pointilleux, i inspecte, i tate. Rien!

Et Valentin i s'in va chez nos amis Français.

Et l' jeu i dure ainsin pindant des meos. D'timps in temps, Jean-René i ravisse d' pus près, passe l' sable au tamis. Rien.

Vingt ans pus tard, su l' Côte d'Azur, v'là Jean-René qui cait nez à nez avec Valentin.

«Quoisque t' fous ichi, qu'i li d'minte l' douanier, alors pinsieonné ?» «J'ai ouvert un Clup privé à Fréjus et j' coule ichi des jours heureux...»

Ch't'alors que l'questieon qui li brûleot les lèfes d'puis lonmint, elle sort infi n: «Dis-me Valentin, quand ç' que t' passeos l' douane, quoisqu'i-aveot dins l' sable ?» «Rien, foqu'du sable».

Bin seûr, l'incien douanier i-insiste: «Mais infi n, te n' vas tout n'même pos m' dire que te n' trafiqueos pos eine séquoi ? Te passeos bin quéqu'chosse in douche, neon ?»

Là, Valentin i s' fout à rire et i sort à Jean-René: «Quoisque j' passeos in douche ? Bé des véleos, tins!»

Allez, là-d'ssus, à l' feos qui vient, mes gins!

L'Infant d'Tournai