9 février 2011 par L'Infant d'Tournai  

Bonjour, savez, mes gins !

Et alors queus nouvelles ? Ch’est les riches qui l’eont pus belle ! Mo, bé j’ai d’jà intindu cha eine séchu…

A part cha, in veyant l’titre, vous d’vez s’deminder seûr’mint de qui ç’que j’veux parler ? N’avez pos trouvé ? Bé, verdi passé, j’ai été vir les Filles, celles picartes qui comminch’tent leu nouvelle saiseon. Ch’éteot l’prumière et i z’aveot’tent l’trac. On areot dit qui z’aveot’tent perdu leu quinzaine. Infin cha, cha s’comprind, éné ? L’prumière feos, on s’deminte toudis commint qu’cha va aller ! Mais après, cha a été tout seu…

L’décor i-aveot cangé par rapport à l’dernière feos dùsqu’i f’seot’tent leu cinéma. Ichi, comme l’affiche elle le diseot, elles z’orvienn’ttent d’su l’Grand Plache. Ch’t’ainsin que l’titre ch’éteot  « Elles prennent toute l’(grand) Plache »… Et bin seûr, elles s’ortrouèf’tent…à n’eine terrasse ! Pasque de ç’côté-là, i dis’tent toudis su l’Cabaret…mais eusses, leus verres i n’eont jamais l’temps d’ête vites non pus savez!  Infin, canter, i parait qu’cha deonne seo !

Beon, orvennons au programme. Bé ch’est comme tous l’z’ans, i-a d’l’humour, i-a de l’tindresse. I-a des momints qu’on rit plein s’panche et i d’a d’z’éautes qu’on a l’larme à ouèl. Ch’est normal vu qu’ch’est des feimmes, on sait bin qu’elles seont pus sintimintales que les heommes. Quoiqu’alfeos, i-in a aussi qui saf’tent s’y mette. Et i-a aussi l’actualité ; là, i d’a eine paire qu’i z’in prenn’tent pou leu grade ! Infin, ch’est cha aussi ête cancheonnier. Ch’est dire in cancheon, mais avec humour et bin héaut, ç’que tertous i pinse tout bas.

Infin, j’ai passé eine beonne soirée,  j’ai bin eu du plaisi, et j’pinse que les gins dins l’salle i d’eont eu avec.

Alors, si l’cœur vous in dit, i n’feaut pos hésiter à aller l’z’acouter pasqu’elles eont bramint d’talent. Et quand j’dis elles, ch’est Belinda, Françoise, Laurence, Alexandra, Catherine, Dominique, Sabrina et Marie-Astrid, avec toudis Jean-Marie au pianeo pou l’z’accompagner. L’saiseon elle ne fait qu’commincher car elles cantent acor les 12, 13 féverrier, les 8, 10, 16 et 17 du meos d’avril. L’verdi et l’saim’di, ch’t’à 20 heures tandiss’ que l’diminche (ch’est l’jour qu’i-a de l’tarte…), ch’t’à 15 heures.

J’vous asseure que cha veaut l’queop et qu’vous l’n’orgrett’rez pos.

Ein beon consel : si vous n’voulez pos faire l’file l’jour du spectaque, i vous feaut aller querre vos plaches à l’Librairie Lenglez, à l’plache de Lille.

Allez, là-d’ssus, beon amus’mint et à l’feos qui vient, mes gins.

L’Infant d’Tournai