Semaine 16  2007 par Catoupi

Ceulle questieon, on s' la posse tous les s'maines.  Alfeos, on n' trouèfe rien d'intéressant à faire, même in épluchant l' gazette, les programmes du cinéma (feaut dire qu'i n' sort pos ein bieau film tous les s'maines), les calinderriers sportifs, et j'in passe.  On est alfeos obligé d'orwettier l' télé, bé queu malheur !
Par queonte, ceulle sémaine, on va avoir eul choix, et malhureus'mint, on n' sara pos tout faire...  Mi, qu' j'aime bin l' musique, l' patois et l' carnaval, j'ai orténu deux évén'mints qui veont s' passer in même temps saim'di au soir.
D'abord, pou l'z'amateurs de musique, pus particuïèr'mint d' cancheon françaisse, i-a ein bieau duo d' pianos dins la Halle aux Draps.  Ch'est Philippe De Smet et s' comarate Patrick Salmon qui jeuttent à deux plein d' mélodies d' grantes cancheons françaisses ed' tous les époques.  Comme ej' l'ai d'jà vu deux feos, j' peux l' conseiller, mais in même temps, j' vas pouvoir aller vir l'éaute évén'mint que j' vas vous in parler asteur.
Cha va s' passer à l' salle Saint-Lazare saim'di à huit heures et d'mi au soir.  Les P'tits Rambilles, que ch'est eine confrérie d' carnaval qui-aime bin d' canter in patois, elle organisse es' nouévième cabaret patoisant !  Ch't'ein cabaret ein p'tit queop pus déluré, dusqu'on parle du carnaval, mais aussi d' tout plein d' sujets d' toutes sortes.
A ç' cabaret, ch'est pos eusses qui feont tout l' spectaque, pasqu'i laichtent eul plache su l' ponteon aux ceusses qui veultent essayer d' canter eine cancheonne qu'i z'eont écrit, ou bin d' jeuer dins ein sketche.  Ch'est ainsin qu'i-a eine paire d'ainnées, on a vu là eine paire de canteus ou d' canteusses, qui z'eont v'nu su l' ponteon, et qu' cha leu z'a plu.  Résultats des courses : i-in a qui z'eont rintré au Cabaret Walleon ou dins les Filles, celles Picardes.
Adeon, on peut dire que l' cabaret des P'tits Rambilles, ch'est comme ein laboratoire, pour vir si on peut vir pus leon...
Et pou les spectateurs, ch'est eine beonne occasieon d' passer eine beonne soirée, fell'mint amusante et pleine de surprisses.
Adeon, si vous avez li m'n'artique, ch'est qu' vous aimez bin l' patois !  Alors, j' vous conselle aussi l' nouévième cabaret des P'tits Rambilles !
 
Catoupi