16 février 2011 par Du beos d'chuque  

D'puis qu' j'éteos infant j' n'aveos jamais busié qu'à cha, rinveyer du mieux possipe ceulle pétite balle à l'ceulle qui s'reot in face de mi.

Ouais mais tout cha in souhaitant qu'elle ne r'venn'reot pos de m' côté.

I m'a fallu bin du corache pou arriver à ête l' meilleure, pos de m' quartier ni même de m' pays ! Neon mi ch'éteot l' meilleure du meonte et cha bin seûr in orpinsant à tous les modèles que j'aveos eu dins m' jeonesse, ouais ces fi les qu'i-éteotent arrivé à faire presque aussi bin qu' les heommes in maniant ceulle raquette du mieux qu'i pouveottent.

Tout in pinsant à m' mamère qui nous aveot quitté bin treop teôt, j' n'aveos pus qu'eine seule idée in tiête: ch'éteot d'ête ein jour au sommet.

Cha n'a pos été facile, in puque que du côté fl amind du pays, bé i d'aveot eine qui pinseot à l' même affaire que mi; mais là cha s'a si bin passé qu'à ein moumint donné, eh bin on éteot à deux in tiête de l'hiérarchie mondiale !

Mais queul honneur pou no p'tit pays d'avoir pu faire intonner l'Brabançonne aussi bin pa des Walleons qu' des Flaminds.

Infi n ç' problème qui nous carmousse pou l'heure layons le d'côté pasque pou l' moumint ç' qui m'imbête ein p'tit queop ch'est qu' j'ai là dû ringer m' raquette à cosse d'eine saleté d' blessure à m' coute. Et ch'est ainsin que j' vas déveoir cacher eine occupatieon qui m'inchint'ra tout autant que ç' qui m'a fait avoir du bonheur ces dernières ainnées.

Mais quoisque j' pourreos bin faire ? J'aveos bin approuvé d' canter et même ed' faire de l' comédie mais cha n'a pos vraimint été eine réussite, adeon i feaudreot qu' j'areos eine soudaine inspiratieon ou adeon eine p'tit anche qui viendreot m' dire à l'orelle «Manman te vas m' moutrer commint qu'on tient ceulle raquette pasque mi aussi j' voudreos qu'ein jour te soiches fi ère de t' gamin et pétête aussi des ceusses qui n' s'reotent pos les tiens mais à qui t'aras pu moutrer commint qu'on fait arriver là».

Cha n' peut pos ête ein mauvaisse idée: «Pinse bin à ceulle idée, elle n'est seûr'mint pos mauvaisse» !

Du beos d'chuque