16 mars 2011 par Codolette  

Vous savez bin qu' j'aime bin d' démépriser. Feaut dire qu'alfeos, i-a d' quoi, savez!

Acoutez l' plan qui-a arrivé à Francine, eine feimme de m' rue, i-a pos lommint quand elle a dû printe el' train.

Elle arrife bin timpe au matin avé s' carrette, et bin intindu, elle ne trouèfe pos d' plache gratuit.

L' disque, cha n'alleot pos non pus, vu qu'elle parteot pou tout l' journée. Cha fait qu'elle décite de s' garer su l' parkinne payant d' la SNCB. Elle rinte es' carrette, elle orcheot ein ticket, qu'elle deot bin warder pou l' paiemint au soir.

L' journée elle se passe bin et elle orvient du soir pour orprinte es' carrette. Elle met l' ticket dins l' machine, et elle fait pou payer avé s' carte d'banque. L'apparel i n'in veut pos! Elle essaie eine paire de queops, mais cha n' va toudis pos.

V'là qu'ein abonné i passe, et i li dit: «eine feos sur deux, ç' bazar i n' marche pos!» Li, i-aveot s'carte d'abonn'mint, adeon pos d' problème pour li sortir.

Francine elle s'in va vir à la gare quoi ç' qu'elle deot faire. On li répeond: «Ah madame, nous z'éautes on n' sait rien faire pour vous, l' machine elle est dirigée par eine fi rme d' Lièche. I vous feaut appuyer sur l' parlophone et i-a quéqu'ein qui va s'occuper d'vous» Vous s'rindez queompte ?

Elle ortourne au parkinne, et bin seûr el' parlophone i n' marche pos... Hureus'mint, i-a ein naveteur qui li a v'nu in aide: i li dit ainsin: «mettez vo carrette tout jusse derrière el' mienne, pare-choc queonte parechoc, et on va sortir ainsin l'ein derrière l'éaute».

Et ch'est ainsin qu' Francine elle a pouvu sortir du parkinne.

Bé queulle affaire!

Là-d'ssus, j' vous dis à ein d' ces jours pour ein éaute déméprisache.

Codolette