No current events.
Semaine 18 2007 par Arnitoile
V’là qu’on veut détruire no peont-des-treos asteur ! Tout cha pour laisser passer des batéaux d’treos mille teonnes ! Si l’Wallonie elle veut avoir eine part du watieau dins l’transport fluvial inter Paris et Amsterdam, i va folloir faire saut’ler no peont-des-treos. Obin l’contourner. Sineon tous les batéaux i veont passer pa chez les Flaminds via l’chité des Eperons d’Or. Et l’port de Tournai, i voirra pus rien. Tins, au jusse, vous saviez qu’i-aveot ein port à Tournai, éné ?
Bin seûr, i-a les chiminteries qui voudreottent bin vinte leus cailléaux à les Parisiens, mais pou cha i doif’tent pos passer par Tournai ; sauf s’i veul’tent les vinte aussi à les cachiveux d’Hollante.
Adeon, l’consèl communal i s’a prononché pou faire passer les batéaux d’treos mille teonnes su l’Esquéaut. I faudra bin faire eine séquoi. Obin on élarguit l’Esquéaut pa l’rife droite et on fait ein sorte de contournemint du peont-des-treos. Mais cha va coûter tchier ; d’a d’jà qui dis’tent que cha va coûter quate feos pus tchier, d’zéautes, dix feos puque ! Et si on fait cha, cha s’ra eine intrée de l’ville in mouins pou les carettes. Tous les gins d’Kain i d’vront passer pau Viaduc. Milliard, cha promet d’riches imbouteillaches !
Obin on fait saut’ler l’arche cintrale du peont, mais i paraît que ch’est foc de l’pierre de garniture et qu’à l’intérieur des gambes du peont, ch’est tout du béteon. Bé cha n’va pos ête facile à inl’ver !
Evidemmint d’a seûr’mint qu’i veont rouspéter qu’on détruit l’peont ; pasque l’peont-des-treos, i fait partie d’l’imache de Tournai. On peut vir n’importe queu artique su Tournai, ch’est toudis l’imache du peont-des-treos avé dins l’feond l’cathédrale et l’bieffreo qu’on moute. Tins, j’sus seûr que Roger Delcroix, qui-éteot échefin du tourisme avant d’ête bourguémette et qu’i aveot fait restaurer l’peont, i deot in ête malate !
Acore que tout queompte fait, ceulle arche elle est bin récinte puisque les Inglais i z’aveotent fait saut’ler l’peont in quarante. Et qu’après la guerre, quand on a orconstruit l’peont, on a surélevé l’arche cintrale pour laisser passer des pus greos batéaux. M’mopère qui habiteot acore chez ses parints su l’quai Staline – aujord’hui, cha s’appelle quai Sakharov – i m’raqueonteot qu’cha faiseot bramint d’boucan et, je sais pos si ch’est pasque les travéaux i commincheotent fort timpe ou dureotent fort tard ou qu’i aveotent lieu pindant l’nuit égal’mint, mais i-a eine feos qu’i a pris l’téléphone et qu’i a app’lé l’bourguémette de l’époque in li disant : « Vous dormez ? Moi pas ! ». Bé l’bourguémette de l’époque i-a dû ête rud’mint saisi. J’espère pou Mossieu Massy qu’i n’d’a pos ein, ein d’ces jours, qui va avoir l’même idée qu’li.
Infin, j’ai li dins l’gazette i-a eine paire de s’maines que l’gouvernemint walleon i-alleot donner priorité au transport fluvial et porter toutes les voies navigapes de treisse chints chinquante teonnes à deux mille teonnes. A ç’t’allurte-là, on n’est pos près d’vir des batéaux d’treos mille teonnes dins Tournai !
Arnitoile
< Précédent | Suivant > |
---|