6 novembre 2013 par El Soyeu du bas de l’cinse

Banjour, bansoir les gins,

Ch'est ein bistreot qu' les moinsses de vingt ans i n' connaiss'tent pos. Infin, quanç'que j' dis qu'i n' connaiss'tent pos, c'est pos tout à fait vrai, vu qu'i-existe acore. C' bistreot i-éteot t'nu, dins l' temps, par Nadine et Serge.

Du midi, on veyeot arriver les pompiers, les postiers, les policiers, les imployés et beauqueop d'z'éautes pour minger leus tartines, mais surtout pour croquer eine pinte, ou deusse, ou treos....

Et puis, et puis, avec l'âche, i d'eont eu assez et les tenanciers, i z'eont ormis l'établissemint à d'z'eautes que, mi personnell'mint, j' n'ai pos connus.

Mais depuis eine paire d'ainnées, adeon deux ainnées, on a cangé l' neom du bistreot et i vous feaut vir cha, qué dallache avé l' nouvieau patreon. S' feimme elle fait l' dreot et li i fait tout d' travers (infin, ch'est ç' qu'i dit!!!).

Ch'est vrai qu'i-a pétète ein peu moinsse de pompiers, postiers, policiers, imployés, mais i seont rimplachés pa des bouchers, chevilleus, carrossiers, macheons, menuisiers, ... qui viennt'tent tertous ou à peu près minger leus tartines mais surtout pour chuffler eine paire de pintes. Et l' soir, c'est toudis rimpli mais ceux-là i n'minch'tent pus leus tartines, mais i beottent des pintes.

Et ç' qu'i-a d' comique, ch'est que l' patreon i-a donné un surneom à presque tous les clients, comme par eximpe : Bubu, Piscine, Train, Mort, Director, Fossile, Buveu, el' Gus, el' Grand (alors qu'i fait ein mète chinquante !), R'ssort, Youyou, et bin d'z'éautes acore....

C' bistreot, je n' peux pos l' chiter pou n' pos faire de l' publicité déguisée. Mais in tous les cas, si vous veyez d' queu bistreot que j' veux parler, je n' peux qu' vous conseller d'aller y faire eine pétite visite : l' patreon i m'a promis, mais ch'est à vérifier, que l' ceu qui buvreot dix pintes d'ein queop, l'onzième s'reot offère par li.

Là-d'ssus, mi j' m'in vas in boire eine à s' maseon et si on s' rinqueonte là-vas, bin volontiers, mi avec j' vous in paierai eine.

Su ceull' beonne parole, banjour, bansoir les gins ! Et à béteôt pour eine nouvelle bafoule.

El Soyeu du bas de l'cinse