20  novembre 2013 par L’Infant d’Tournai

Bonjour, savez, mes gins.

L'semaine passée, alors que je m'pourméneos dins no ville, v'là que j'm'ortrouèfe derrière ein camieon d'la ville. Pos ein camieon-poubelle, mais puteôt eine camionnette qui sert à transporter l'matériel pour que les ouverriers communaux i peuf'tent faire leu n'ouvrache.

Cha s'passeot dins l'rue d'l'Yser et tout d'ein queop, l'camionnette elle s'arrête et i-a ein ouverrier qui déquind. Et vous savez ç'qu'i-a fait ? Bé i-a tout simplemint ramassé ein carton plein d'bricoles que des gins i-z'aveot'tent laiché in plan, in plein mitan de l'ville. Vous s'rindez queompte ?

Là-d'ssus, j'm'ai fait deux réflexieons – Ahais, ch'est pos tous les jours que cha arrife, après cha, j'éteos esquinté - : tout d'abord on critique treop facil'mint les ouverriers de l'ville. Ces gins i feont tout leu possipe et j'trouèfe qu'on f'reot mieux d'les incorager pasque, - et là ch'est m'deuxième réflexieon - si i z'eont eine masse d'ouvrache, ch'est aussi pasque les gins i n'respectent pus rien.

I-a toudis des gins qui feont beonne chair à toudis s'plainte du manque de propreté dins l'chintre-ville. Ch'est facile d'pourméner avec eine caméra ou ein apparel-photo pour moutrer qu' no ville elle n'est pos bin intertenue. Mais si on s'in va mette ein sa-poubelle après que l'camieon d'la ville i-est passé, ch'est tout n'même pos l'chauffeur du camieon qu'i-est responsape ! I feaut ête bénét pou n'pos s'aperchevoir que si les gins, et pos seul'mint les Tournaisiens, i z'éteot'tent ein p'tit queop pus disciplinés, cha l'ireot tout n'même mieux.

N'impêche que mi, après ç'que j'ai vu dins l'rue d'l'Yser, j'trouèfe qu'on peut tirer ein queop d'capieau à ces ouverriers qui-eont l'ouel à tout pour que nos cheonq clothiers i soich'tent toudis aussi accueillants pou les tourisses...et agréapes pou nous-éautes bin intindu.

Vous veyez, l'critique elle est bin souvint trop facile. Et pourtant, si on mettreot chaquein de l' beonne voleonté, vous n'trouvez pos qu'cha l'ireot bin mieux ?

Là-d'ssus, à l'feos qui vient, mes gins.

L'Infant d'Tournai