27  novembre 2013 par Tignace

Banjour mes gins, pindant l' périote des vacances du Toussaint (et qu'i veont au diape avé leus vacances d'automne), eh bé l' conservatoire, ch'est comme à l'école, ch'éteot congé.

Du queop, j' deos pos vous faire ein dessin, du saim'di au matin, Gertrute m'imbarqueot pour aller à les commissieons !

Comme i f'seot à mitan sec, elle a voulu qu'mincher pa l' marché. Allez, on éteot parti pour acor tourner su l' plache in orwettiant des étales à loques dùsqu'on trouèfe les mêmes foufes qui seont vindues à les quate z'eautes coins. Pou varier l'affaire, hureus'mint qu'i-a acor l' marchand d' montres, ein eaute pou l' toubaque et l' cameleot qui t' fait l' démonstratieon du manche à nettier qui va presque tout seu mais quand te t'in sers à l' maseon, t'ortournes bin vite orprinte t' vielle raclette et t' wassinque.

Asteur, te veos même eine roulotte à hamburgers ... A 10 heures du matin, cha deot caler l'estomac. Avé ceulle odeur qui m' caresseot l' naque, in freumant les z'is, j'imagineos qu' ch'éteot comme dins l' temps avé les moulins su plache quand ch'éteot l' karmesse.

Cha y-est , nous v'là orpartis pour ein tour dins l'eaute sins, au cas où elle n'areot pos vu eine beonne affaire du prumier queop.

« Ah, v'là ç'que j' cacheos » qu'elle dit Gertrute. Ch'éteot eine sorte de mareonne leugère pour aller à l' gymnastique ; ein legging qu'i diss'tent asteur ...

Du queop, comme eine rate, v'là directemint « Baba la beonne affaire » qui s' pointe : « Pas cher, pas cher, taille unique Madame ». Gertrute, qu'i-est bin in chair, tireot ein peu d' part et d'eaute pou vir si elle pourreot rintrer d'dins.

L'vindeu i carpinteot d'jà avec ein sac plastique pou l'imballer et pou li orchevoir ! Malhureus'mint, elle trouveot cha treop p'tit. L' pus dur cha a été de l' faire comprinte à l'imployé d' service, on a même dû aller jusqu'à sortir es' lanque du diminche pasque j' pinse qu'i -areot mieux compris si on berdeleot flamind !

L' lanque de « Molière » aidant, alors que m' Gertrute éteot prête à tourner des taleons, orv'là « Baba la beonne affaire » avec eine eaute mareonne, « Grande taille Madame, grande taille ». On s' ravisse in li disant qu'i-aveot dit talle unique ! « Mais nous avons taille unique petit et taille unique grand » !

Tins, ceulle-làl, on nous l'aveot jamais fait ! Si cha ch'est pos pousser l' boucheon à l' vinte.

M' Gertrute, qui n'est pos cait de l' dernière plouèfe, li d'minte alors l' prumière mareonne pou comparer. Eh bé mes gins, j' vous l' jure, ch'éteot bin eine tale unique « Grand » ! Et que te preneos l' pétite ou bin l' grante tale, el' prix i-éteot hureus'mint bin unique !

Ah mes gins, à écrire ceulle bafoule, j'in ris acor tout plein : quand on s'a ormis in route, vu l' meonte, Gertrute marcheot d'eine dizaine de pas pa-d'vant mi et in l' ravisant du heaut in bas j' li dis : « Em' chérie, j'ai vraimint de l' sanche que t'as là ein bieau arrière-train unique » !

Tignace.