11  décembre 2013 par Du beos d'chuque

Arts loi, hé bé si vous n' savez pos ç' que ch'est i vous feaut d'aller faire ein tour dins l' métro d' Bruxelles dusqu'i-a eine éstatieon qui s' déleomme ainsin vu qu'elle est à l'anque de l' Rue d' la Loi et d' l'Av'nue des Arts.

Bin seûr qu'i n'a pos fallu s' mette à l' quémisse pou trouver ein neom parel.

Hé bin ichi dins no Tournai L'Art et l' Loi i seont in brisbroule et tout cha à quéausse d'eine belle fresque qui-a été peinturluré (infin puteôt taguée) d'sus ein mur de l' ville et tout cha sans eine autorisatieon préalape qu'i-areot dû ête faite dins les règles d' l'art infin puteôt dins les règles d' la loi.

Ah cha on n' peut pos dire que ch' n'est pos bieau savez, mais l'ov'là cha n'est pos réglemintaire. Du queop bé l'proprio de ç' bieau pigneon i s'a ortrouvé pa-d'vant l' juche pour li s' faire intinte qu'i li falleot ormette s' façate dins les couleurs qu'i-orsannent à nos pierres bin Tournaisiennes. Mais pou cha on li a tout l' même laiché ein p'tit délai pou li avoir l' temps d' racater de l' couleur ou bin d'approuver d'amicloter les ceusses qui veul'tent vir partir ceulle belle œuvre bin foutue pa des jeones talints qui n'attindeotent qu'à s'esprimer. Mais l'ovlà la Loi ch'est la Loi.

Mais j' pinse là tout d'eine traque à les habitants d' Vaulx qui n' seont pos leon d' l'Escaut dusqu'on a là érigé ein mur (pos l' ceu d'la heonte mais presque) pou l' nouvieau port fluvial ; hé bin i faudreot qu'i s'ormutent pou faire eine déminte pou l' futur Centre culturel à ciel ouvert.

Et là j' m'esplique : vous pinsez bin qu'avé eine aussi belle surface les tagueux i veont là avoir eine fameusse source d'inspiratieon et surtout ein espace grandiosse.

Cha d'vreot normal'mint donner d'z'idées aux gins du tourisme Tournaisien pou s' dire qu'i-a là eine richesse picturale qui pourreot profiter à no ville in attindant qu' no Cathédrale elle soiche débarrassé des qu'miches qu'on a là mis d'sus no clotchiers et in pinsant au futur d' no peont des treos qui pourreot ein jour ête galvanisé « Ah ouais pou chà on n'arrête pos l' progrès »

Du beos d'chuque