18  décembre 2013 par El Soyeu du bas de l' cinse

Banjour, bansoir les amisses,

L' semaine passée, ch'éteot l' fiête du grand Saint de tous l' z'infants sages, el' fiête ed' Saint-Nicolas, et adeon, comme tous les grands-parints qui s' respectent, m' feimme et mi, on a fait no tour pou nos p'tits-infants.

Ch'est vrai qu'on a pos treop orgardé à l' dépinse, mais tout d' même pos d' treop non pus, pasque ch'est d' pus in pus tchier et que, d' tout' faceon, les infants, te peux leu z'acater eine bricole ou ein jouet qui t' coûte les is de l' tiête, ch'est bin souvint avec eine bernette qu'i s'amus'tent acor el' mieux.

Vous in voulez eine preuf'. M' feimme, elle a adeon queusi l' jouet que l' pétite elle aveot d'mindé. Et in f'sant l' tour dins l' magasin du saint, elle trouèfe eine bricole qui n' coûteot pos trop tchier et elle me dit : «— Bah ch'est pos cha qui nous ruin'ra.»

Eh bé, te m' croiras si te l' veux, ch'est à peine si l'infant i-a orwettié l' jouet. Par queompte, el' bricole, elle s'a amusé pindant des heures intières. Cha ch'est pour l'anecdote.

Pour parler d'aute queosse, après tous ces fiêtes patronales, on s'ra acore vite à l' Noé et à l' nouvielle ainnée.

Adeon, j' vous souhaite à tertous des beons réveilleons (si vous les f'sez) et d' toute faceon, eine beonne fiête de Noé et eine joyeusse beonne ainnée. Et surtout, n'obliez pos les p'tits cabarets du meos d' janvier, les canchonniers i m'eont promis des soirées d' feu.

Su ceulle beonne parole, banjour, bansoir les amisses ! Et à béteôt pour eine nouvelle bafoule.

El Soyeu du bas de l' cinse