24 décembre 2013 par Tiête de lard

Quand j' beos eine pinte avec l'ein ou bin l'éaute, quand j' sus dins l' train pour aller à m'n'ouvrache et qu' j'acoute ç' que les gins i raqueontent, i d'a bramint qui seont défoutus pasque ch'est l'hiver, qu'i fait freod, qu' les jours i seont courts et qu'i n'a pus beauqueop d' leumière. Tout cha, cha n' leu deonne pos l' moral.

Mi, j' dis qu' même avec tout cha, l'auteomne et l'hiver ch'est deux saiseons qui deonn'tent du plaisi ; j' vas ichi vous deonner eine paire d'eximpes.

Aller dins l' beos au meos d' novimpe, sintir les fouelles ramonch'lées d'su les drèfes ou pa-d'zous l'z'arpes. Rimplir ein sacleot in plastique d' marreons pou les faire réqueauffer d'su l' plaque de l' busse, et si i n'a pos d' busse, dins l' feu à bois ou dins l' four. Sintir l'odeur, l'z'épluquer, in f'sant comme dins l' temps l' noir quart d'heure.

Casser eine paire de guéauques toutes fraiques, inl'ver l' pieau, les minger avec eine beonne pinte. Raviser l'z'arbusses tout blanquis par l' giélée, orwettier les mazinques et les mauviars v'nir pluquer l' restant d' pain qu'on a rué su l' trottoir.

Mi, j' trouèfe que tous les cang'mints d' saiseon i-apportent de l' bénaiss'té. J' sus rabi, après l' Toussaint, d' minger mes prumiers chiqueons, bin cuits au bure, à mitan brûlés ou bin in ratatoule. In parlant d' ratatoule, l'hiver, ch'est l' moumint des ratatoules. Aux navieaux, aux escarolles, à chou rouche avec du lard ou de l' saucisse.

Et quand i neiche ? Ch'est vrai qu' cha fout de l' détoule d'su les routes, mais raviser pau cassis quand elle cait, ch'est tout n' même ein bieau spectaque. Marcher d'su l' neiche quand elle est toute fraique, acouter l' bruit qu'elle fait quand ç' qu'on l'écrasse avec nos greos sorlets, raviser les traces que les osieaux et les cats i z'eont laichées, ... I-a pos à dire, cha fait plaisi aux is et à l'z'orelles.

S' mette dins l' fauteul pa-d'vant l' feu à bois et raviser les flammes qui dans'tent et acouter l' bruit que l' beos i fait, ch'est du bonheur.

In raqueontant tout cha, je m' dis qu' j'ai de l' sanche à pouvoir acouter, raviser, sintir, goûter à tous ces p'tits plaisirs pasqu'i d'a des ceusses qu' l'auteomne et l'hiver, pour eusses, ch'est l'infier. Adeon, à tous les ceux que j' beos eine pinte avec, ou qu' j'intinds dins l' train, qui s' plain'tent qu' les jours i seont courts et qu'i n'a pos beauqueop d' leumière, j' leu dis d' busier à les ceusses qui n'eont pos toudis l'occasieon d' minger ou de s' queauffer comme i faudreot.

Ch'est béteôt l' Noë, ch'est l' moumint d'y pinser comme on devreot toudis y pinser.

Tiête de lard