1° janvier 2014 par Catoupi

Bé qu' cha va vite eine ainnée ! On a l'impressieon qu'on vient de s' dire « beonne ainnée et beonne santé », et nous ov'là d'jà à l' suivante. J'ai alfeos l'impressieon qu' au puque on avanche, au puque l' temps i passe vite.

J'espère que vous avez bin fiêté l' Noë, avec vo famille ou bin d'z'amisses. Ch'est vrai qu'avec el' crisse, i-a seûr'mint des gins qui d'eont fait mouins qu' d'habitute. Mais i feaut s' dire que cha l'ira mieux et n' pos tout vir in noir. I-a aussi moyen d' passer des beons momints sans dépinser des mille et des chints.

Mais quoi ç' que ceulle nouvelle ainnée elle nous réserfe ? Pour no pays, deux grands évén'mints à m'n'avisse.

D'abord, i va d' nouvieau avoir ed'z'électieons. Cha fait qu' d'ichi l' meos d' mai, les politiciens, qui s'intint'tent si bin au gouvernemint, i veont orcommincher à batt'lier, à dire qu'i seont les meilleus dins leu parti, et qu' ch'est grâce à eux qu' tout i-a bin tourné et que l' pays i va si mieux.

I-in a qui direont qu'i n' veultent pos négocier avé les indépindantistes flaminds, d'z'éautes qui s'reont prudints et qui direont qu'i n' feaut rien esclure. Cha promet...

Et après l'z'électieons, on s'ra r'partis pour eine paire de meos sans gouvernemint.

Pindant ç' temps-là, (deuxième évén'mint d' l'ainnée) pétête que les Diables Rouches i-areont eu eine pétite influeince su l'unité nationale, in espérant qu'i veont loin à l' coupe du meonte. Alors el' moral des gins i va seûr'mint ormeonter.

Allez là-d'ssus, j' vous souhaite eine beonne et hureusse ainnée deux-mille quatorsse, et si vous avez des infants, n'veux, nièces, p'tit-infants ou je n' sais quoi, n'obliez pos l'z'étrennes : mettez vo main à vo saclet, et n'orwettiez pos ç' que vous donnez.

Catoupi