29 janvier 2014 par Tignace

Banjour mes gins, comme pou tertous, i-a des jours où i-a d'l'iéau dins l'gaz au ménache ...

L'éaute jour, avé m'Gertrute on éteot in plein 14-18, on campeot tous les deux su ses positieons in disant : ch'est mi qui-a raiseon ! Alors, avant l'invoi d' l'artill'rie lourte ( l' vaisselle), j'ai seonné l'ortraite in claquant l' porte pour ainsin canger d'air. L' soir i-éteot cait et j'ai pris l' quémin de l' grand-plache, histoire d'aller vir les illuminatieons et d' faire eine reonte dins l' pétit villache d' Noé.

In ormeontant l' rue de l' Lanterne, alors qu'i-aveot cor des lampes de saut'lées, j'alleos croiser treos albrans pos treop clairs, adeon, avé ç' qu'on intind, j'ai cangé d' trottoir ... Arrivé su l' plache, j'éteos tout fergu d'ortrouver m' vieux comarate Mimile et du queop, on a pris ein beon vin quéaud in raqueontant l' bieau temps d' nos jeonesses. Après deux treos tournées, j' sinteos qu' j'aveos perdu l'habitute ... Pos d' boire savez mais j' deveos d'jà aller picher ! Comme asteur i n'a pu d' pichataines, bé on a été à l' Botte de Lin pou mi m' soulager et du même queop, on a r'mis eine pinte au-d'zeur. Millard, su l' temps d' no soirée, quate queops que j'ai ortourné faire braire em'chiffleot. Après l' patreon i nous a dit qu' ch'éteot l' dernière et qu'i falleot pos défier Polo pour l' z'heures d' fermeture. Adeon, on a vidé nos verres à s' santé et on s'a dit à eine prochaine.

Meon qu' j'éteos fin gai, comme si l' meonte i-aveot cangé, même qu'in traversant l' plache, j' canteos « La belle de Cadix » in pinsant à ortrouver m' Gertrute qui m'attind à l' maseon. Du queop, i d'a qui z'eont bertonné à leu cassis pasqu'i n' saveottent pos dormir ... Queulle idée d' laicher s' ferniête ouverte, franch'mint ! Par queonte, j'areos cor dû faire eine pétite vidanche avant d'orsortir pasque Polo i n'aime pos neon pus qu'on piche tout partout. Ah si j' teneos l' gaillard qui-a fait serrer nos pichataines... Alors que j' déquindeos pa l' rue des Capeliers, in f'sant toudis bin attintieon avé tous ces traveaux, j'ai orcait su les treos agozils de t'taleur et z'allez pos l' croire mes gins : ch'est eusses qui z'eont cangé d' trottoir ...

Eine feos à l' maseon, bé j'ai dû cacher perdu après mes clés. A causse du treo dins m' poche, elles aveot'tent foutu l'camp dins l' doublure et tout cha, sur eine gampe et puis su l'eaute, tellement que m' vessie elle travailleot. Ah, cha y-est, i-éteot temps, j'alleos faire à m' marreone. Après cha, surtout pos déréveiller « Goliath », ch'est m'Shih-Tzu, sineon l'matreonne alleot r'lancher les hostilités. Neom de zeo, v'là ti pos qu' ceulle sale biête i-a donné l'alarme !

« Et alors ! Ch't'a ç't'heure-chi que t' rintes ? Et de dùsque t'orviens ? Hein ? » J'éteos cuit !

« Ma belle de Cadix, mes p'tits z'is d' velours, avant d'orqu'mincher no sérénate, te n' voudreos pos d'abord m' laicher aller picher ? » Et comme répeonse j' vous l' deonne in mille : j'ai orchu l' vol du peot d' nuit à l' tiête.

Allez mes gins, à r'voir et à l' feos qui vient.

Tignace