12 février 2014 par El Soyeu du bas de l’cinse

Banjour, bansoir les gins,

I-a eu beauqueop d' gins qui z'eont v'nus nous vir et nous acouter à not' prumier p'tit cabaret deux mille quatorsse. Et à intint' les commintaires, tertous i z'eont été contints. I d'a même qui z'eont dit qu' ch'éteot ein des meilleus depuis bin lommint. Tous les cancheonniers i seont rabis.

Ch'est vrai qu'i-aveot ein p'tit queop d' tout dins ceulle éditieon : d' l'émotieon, du sérieux et du rire.

D' l'émotieon pou Michel qui quitte l' Présidince du Cabaret après cheonq ainnées. Adeon, Michel, tous les compagneons i t'ormercient pou tout l' traval qu' t'as accompli. Et tertous i-espèrent que l' nouvieau, Christian, i f'ra aussi bin qu' ti.

Emotieon acor, quand Bernard i-a orchu s' charge pou dix ainnées d' fidélité au Cabaret. Bravo Bernard et reste comm' t'es. Les compagneons t' charrient alfeos, mais i faut print' cha au second degré. N' canche surtout pos. Bé, cha s'reot pus Bernard.

Et les feimmes, dins tout cha. On n' vous oblie pos, savez. T'nez, on vous invite même au Cabaret Tout Public qui aura lieu el diminche 23 féverrier à 16 heures à la Halle-aux-Draps et cha au profit de Cap48. L'intrée est fixée à 8 euros.

On vous promet un Cabaret de feu.

Vous pourrez, in nous acoutant, boire eine jatte de café frais, du chéribeon quoi, ou boire ein' pinte, ou du vin et minger ein beon quartier d' tarte.

On vous y attind nombreusses ET nombreux.

Ch'est pos tout. El treisse de mars, el Cabaret i va aller canter à Louvain-la-Neuve pour les étudiants de l' Tournaisienne. I-a ein car d' prévu, ch'est ein Tout Public mais attintieon ch'est ein jeudi et on rinte aux p'tites heures.

Après,mais ch'est ein queop pus leon, ein Tout Public acor, pour les quarante ainnées du Handball.

Su ceull' beonne parole, banjour, bansoir les gins ! et à béteôt pour ein' nouvel' bafoule.

El Soyeu du bas de l'cinse