26 février 2014 par Du beos d'chuque

Mo dieu mais queulle affaire. Acoutez ichi ç' que j'ai li dins l' gazette.

Ein rappproch'mint, infin ein jum'lache ou bin ein assimblache ou acor ein mariache inter des gins qui z'eont tout d' même pos les mêmes idées. Ah ouais pasqu'i feaut que tout cha i va insanne et là j' pinse qu'i pourreot avoir du dallache.Ceulle propositieon elle n'est pos vraimint catholique, bin qu'i seont ein p'tit peo ingagés.

Et bé l'ov'là i d'a qu'i-eont eu l' riche idée d' pinser qu' cha s'reot fin bin d' faire el' processieon d' Tournai et les quate cortèches (infin asteur "Tournai in fiête") du même jour. I parait qu' cha pourreot ram'ner des gins in puque d'seur el' ville pasque du matin cha s'reot eine affaire tout l' même sérieusse et d' l'après-deiner ein p'tit peo bacchanale

Meon, bé vous pinsez qu' ch'est là eine idée estraordinaire ou bin qu' cha n'est pos vraimint sérieux.

Et là mi j' sus ein queop imbété pasque mi j' sus ingagé dins les deux affaires. Du matin bé j' s'reos tout fin sérieux avé m' costume du diminche et après-deiner et pétête après l'apéreo, j' pourreos m' laicher aller à faire el' seot d'sus l' char de l' cancheon Tournaisienne. Et bé milliard cha s'reot eine fameusse journée. Et là j' pinse à mes comarates qui seont avec mi dins l' processieon et qui n' ravis'tent pos à in profiter quand i peuv'tent in boire eine quand ch'est ducasse. Pou tou cha i faudreot que ceulle organisatieon elle soiche faite pas des connisseus pasque que l' fiête qu'elle soiche orligieusse ou païenne, hé bé i feaudra toudis des ceusses bin intintieonnés pou faire plaisi à les gins.

Et ch'est vrai qu' l'idée elle n'est pos si biête que cha pasque tous les fiêtes elles vienn'tent des traditieons, qu'elles soich'tent païennes ou bin orligieusses. A l'heure que tertous i battièlle pou des bernettes de tchien cha s'reot eine fameusse occasieon d' faire ein rapproch'mint inter des gins qui n'pins'tent pos à l' même affaire mais qui seont tout l' même contints d' raviser les traditieons d' no chité.

Allez pinsez à tout cha et si vous aimez cha bé vous venn'rez vir les deux.

Du beos d'chuque