5 mars 2014 par Anar

Cha y-est, l' printemps i n'est pos leon. Cha va ! I n'a pos fait treop freod in hiver surtout in janvier et féverrier. Les ouverriers du bâtimint n'eont pos eu beauqueop d' jours d'intempérie, cha ch'est estra, on dit toudis que quand l' bâtimint va tout va.

Pou s' cauffer aussi cha a coûté moins tchier, pour mi i m'a follu moins d' mazout que l'ainnée passée. Je n' sus pos tout seu à l' dire, ch'est toudis cha qu' les arapes i n' nous vindreont pos. On dit qu' pour avoir ein beon été i feaut ein beon hiver mais quand on pinse à l'hiver d'avant et l'été qu'on a eu ch'n'est pos toudis vrai.

Mais tout cha fait aussi que mes plants d' penn'tières i z' eont des gerneons d' dix chintimètes. J' plant'reos bin mes prumières avant l' Saint Joseph, mais m'n'heomme là-vas in haut i-est bin capape d' faire géler à pierres finte in avril foque pou m'imbêter.

Les grantes courses à véleo veont orcommincher. J'espère que les coureus belches i s'reont pus forts ceulle saiseon. Cha fait toudis plaisi quand ch'est ein coureu belche qui ganne même si dins ç' cas-là ch'est pratiqu'mint toudis ein flamind.

Les listes pou les électieons seont à peu près faites et j'apprinds que m' bourguémette n'est pus tiête de liste. Ch'est pétête à cosse de l'histoire des salaires d'Idéta. I parait que l' trinsféré d' Flobecq i n' rigole pos avec les touillaches. Du queop i z'eont pris l' bourguémette d'Antoing comme cha si i passe, i soutiendra acor pus s' grand comarate l' prince de Ligne qui-est comme cul et qu'misse avec. Tout bénéf pour Antoing mais j' plains les monberleots. Pour canger d' sujet, l'eaute jour pou souper j'avaleos ein beon morcieau d' mutieau de boucher de l'Plaine ( j'in beffielle acor foque in l'écrivant) et in même temps d'sus l' gazette j' raviseos les anneonches matrimoniales, et là eine anneonche diseot "veuf in quatrième noce recherche dame". Je m' deminte bin commint que m'n' heomme i-a réussi à faire cha. Mais n'allez pos pinser que si j' lis cha, j'ai invie d' canger d' feimme, comme on dit "on sait ç' qu'on a mais..." allez, à la prochaine !

Anar