19 mars 2014 par Arnitoile

Mi j'ai invie d' jeuer m' Codolette - vous connissez ? -, ceulle vielle graigneusse qui roncheonne toudis sur tout ; eine véritape cachiveusse toudis in train d' démépriser. Bé mi quand j' veos tous les travaux qu'on fait dins l' ville, cha m' rind malate. Bin seûr, i n'a jamais perseonne qui-est bénaisse quand i-a des travaux que cha met dins l'imbarras non seul'mint les automobilisses, mais les cyclisses et les piéteons avec.

Mais ç' qui m' fait inrager l' puque, ch'est quand on démolit tout ç' qui t'neot bin, alors qu'i-a des rues comme l' rue Derasse ou l' rue des Carmes qui-attintent des réparatieons edpus des ans.

Tins, perdez l' rue des Chapeliers. Elle aveot été toute orfaite i-a eine quinzaine d'ainnées avé des beons pavés bin d' chez nous, pos des pavés d' Chine ou d'Irlante qui s'abîm'tent à l' prumière plouèfe. I n'aveot pos ein pavé qui berloqueot, pos ein grès d' travers, pos ein affaiss'mint, même pos ein p'tit treo. Hé bé i-a follu tout démolir alors qu'i n'aveot rien à r'dire et qu'i-a perseonne qui berteonneot !

Et l' plache des Acacias ! Vous s' rindez queompte, elle aveot été orfaite aussi i-a eine quinzaine d'ainnées dins l' cadre d' L'objectif ein. Avé des liards de l'Europe et de l' Régieon walleonne ; cha d'veot ête eine plache intièr'mint piéteonnière. Bé peo d' temps après l' tornate, ch'est dev'nu ein vaste chanthier pou l'z' architèques, l'z' ingénieurs et l'z' ouverriers de l' cathédrale. Et là dùsqu'i d'meureot de l' plache, ch'éteot dev'un ein parkine pou les carettes. Et les sous d' l'Europe et de l' Régieon walleonne, i n'eont jamais servi à rien vu qu'i n' a jamais ein piéteon, ein Tournisien ou ein tourisse, qui-a pouvu ein jour pourméner au calme su ceulle plache.

Et asteur, on orcomminche tout, toudis avé les liards d' l'Europe et de l' Régieon walleonne, et bin seûr de l' Ville. Queu garchénache des deniers publics ! Mi je m' dis alfeos qu' les politiciens qui nous dirichtent, que ç' soiche à l'Europe, à l' Régieon walleonne ou à l' Ville, ch'est des irresponsapes !

Tins, vous s'rapp'lez les cahutes qu'on a construit d'ssus l' plaine des manoeufes du temps d' Roger Delcroix ? Cha d'veot servir à accueulir les cars de tourisses, avé n'eine cahute pou eine sorte d' délocalisatieon du chinte du tourisme et l'éaute pou les tourisses dins l' besouin eus' soulager. Tins, je n' sais pos si vous allez alfeos s' pourméner là-vas mais mi j' n'ai jamais vu ein car de tourisses qui-a là débarqué. Et vous s' rapp'lez combin qu' cha a coûté à l'époque ? Quatorse millieons d' francs belches, treos chint chinquante mille euros ! Sifé, sifé !

Ah qu'i-aveot dit l' bourguémette à l'époque, cha n' va pos coûter grand cosse aux Tournaisiens. Mi j' veux bin mais l'Europe, dùsqu'elle va querre ses liards ? Et l' Régieon walleonne, dùsqu'elle va querre ses liards ? Et l' Ville de Tournai, dùsqu'elle va querre ses liards ?

Bé ché toudis dins l' même tasse, ceulle du citoyen cocheon payeu ! Si vous n' me croyez pos, vous n'avez qu'à y busier quand ç' que vous orchevrez vo fouèle d'impôts dins eine paire de meos.

Alors mi je l' répète, tout ç' garchénache des deniers publics, mi, cha m' rind malate !

Arnitoile