2 avril 2014 par Tignace

Banjour mes gins, comme d'habitute, chaque matin j'ai l'odeur du fraîche café qui vient m' chatouiller l' naque et ch'est l' faceon à m' Gertrute de m' faire comprinte qu'i-est l'heure de m'él'ver. Comme ein rituel, j' vas toudis saquer l' pache de l' velle du calinderrier et j' lis l' pétite histoire qu'i-a au cul. Neom de zeo, à vir el' date du jour, j' l'aveos oblié ...Ch'éteot l' jour d'anniversaire d' no mariache ... Meon, commint qu' j'alleos tirer m' plan ? Comme j'aveos toudis m' bosse à m' tiête du vol du peot d' nuit d' l'éaute jour, j'éteos décidé d'orprinte m'n'orvanche.

M'ov'là lanché : « Banjour m' pétite rôsse, bin dormi ? Et beon anniversaire, cha fait aujord'hui trinte-cheonq ans qu'on est insanne dins l' même barque ». Comme répeonse, j'n'ai orchu qu'eine pétite baisse ... Pou mi, elle brousseot acor. Mais, j'éteos bin décidé d' passer à l'attaque du plan que j' m'aveos fait et, tout in buvant m' jatte de café, j' li lancheos l' prumière vague, j' faiseos d'jà beonne chère !

« Hein m' chérie, qu'on a bin avanché après toutes ces ainnées, à travers les mers et les timpêtes. Dire qu'on a qu'minché dins ein p'tit deux pièches, on aveot eine vielle R4 qui tousseot du peot après treos démarraches, on raviseot, l'ein conte l'éaute el' télévisieon d'à peine trint'-sièt chintimètes d'écran acor in noir et blanc. Et quand on alleot à schlope, on n'aveot qu'eine paillasse mis su des planques et comme tapes de nuit jusse deux caisses à oranches mais, je m' coucheos avé eine feimme de 25 ans ! » .

Pos de répeonse, deuxième vague : « Et asteur, nous v'là avé eine villa, eine Mercédès, eine télé couleurs écran plat qui fait 1 mète 10, ein matelas à l'ieau mais, j' dors avé eine vielle de 60 ans ... ».

Alors là, j' sinteos qu'ses définses alleotent caire ! Mais j' m'attindeos pos à ein parel ortour de manivelle in sol majeur à mes orelles. Em' rôsse aveot sorti ses épeines : « Te sais d' quoi, t'as qu'à jusse aller t' trouver eine nouvielle donzelle de 25 ans, eine qui-ara l' corache de t' faire à minger, d' buer et t'orpasser tes quémisses et quand t' l'aras trouvée te m' dis quoi, ainsin j'in parle à m'n'avocat et t' pourras alors cacher après ein deux pièches, t'orprindras eine vielle carette pourrisse et t' pourras raviser eine vielle télé in noir et blanc comme dins l' temps ! ».

Là, j'ai rindu les armes ! J' n'aveos même pos d' quoi faire ein dernier carré et pou l'armistice j' li ai dit : « Ah m' pétite Gertrute, queu plaisi d'acor sintir el' brûlant d' tes 20 ans ».

Du queop, on s'a mis in route et su l' marché, j' li ai offert ein bieau bouquet d' rôsses rouches comme elle les aime. Insuite, on a été deîner au restaurant et tout in faisant santé avé nos verres de champane on s'a souhaité ein bieau et hureux anniversaire. Ch'est quéqu'ein savez m' Gertrute !

Tignace